Olympic Games Tokyo 2020: IOC Haruka Atleta 29 Reprezenta Ekipa Refujiadu

VIPTV, DILI – Eventu desportu mundial, Olympic Games 2020 ne’ebe realiza iha Tokyo, Japaun hetan mos partisipasaun hosi atleta nain 29 ne’ebe reprezenta ekipa refijiadu nian.

Ekipa Refujiadu ne’e rejista ho naran Refugee Olympic Team (ROT) ne’ebe lidera hosi Komite Olimpiku Internasional (IOC) ho partisipasaun atleta iha modalidade desportu 12.

Hosi atleta nain 29 ne’ebe kompete dadauk ne’e, nain 6 nudar atleta antigun ne’ebe partisipa mos iha Olympic Games Rio de Janieiro 2016.

Ekipa Olimpiku Refujiadu sira ne’e offisialmente forma iha tina 2016, hafoin anunsia hosi Prezidenti IOC, Thomas Bach iha  Assembleia Jeral Organizasaun Nasoens Unidas (ONU) tinan 2015.

Iha Olympic Games 2016, iha atleta refujiadu nain 10 mak partisipa. Atleta sira ne’e refujiadu hosi Ethiopia, Sudan Sul, Republika Arabia Suriah, no Republika Demokratika Kongo.

Yusra Mardini sai atleta dahuluk ne’ebe kompete ba ekipa Olimpiku Refujiadu nian iha numeru metro 100 Women’s Butterfly style.

Iha Olimpiku Tokyo 2020 hamutuk iha ateta nain 11.326 hosi nasaun 205 ne’ebe kompete. No modalidade desportu 33 mak atleta sira kompete.

Olimpiku Tokyo 2020 hahu iha 23 Jullu no sei remata iha 8 Agustu 2021.