Ministra Magno Sei Partisipa Sesaun Konsellu Direitus Umanus iha Jenebra

DILI, www.news-viptv.com – Ministra Negósius Estranjeirus no Kooperasaun, Adaljiza Magno hala’o vizita traballu ba Jenebra (Suiza), Singapura no Doha (Qatar).

Iha Jenebra-Suiza, Ministra Adaljiza Magno sei partisipa iha segmentu nível altu husi Sesaun Konsellu Direitus Umanus ba dá-la 52 ne’ebé sei hala’o iha loron 25 to’o 28 Fevereiru.

“Ministra Magno sei hato’o nian intervensaun kona-ba Timor-Leste nian pozisaun relasiona ho promosaun no protesaun ba direitu umanus nian iha nivél nasionál nomós internasionál. Aleinde ne’e, Ministra Magno sei hasoru malu ho nia omólogu hodi ko’alia asuntu multilaterál nian no hola parte mós iha reuniaun CPLP ho Komisáriu Nivél Altu ba Konsellu Direitus Umanus,” hakerek komunikadu imprensa ne´ebe redasaun simu hosi MNEK, Kinta (23/2/2023).

Hafoin konklui vizita iha Jenebra, Ministra Magno sei hala’o vizita traballu ba Singapura iha 1 to’o 3 Marsu hodi partisipa iha eventu Fundasaun Ázia-Nova Zelándia nian.

Durante vizita, Ministra Magno sei hala’o enkontru bilaterál ho nia omólogu hosi Nova Zelándia no sei kontinua ho assinatura deklarasaun konjunta kona-ba Parséria entre Timor-Leste ho Nova Zelándia. Ministra Magno sei partisipa mós iha almosu, ne’ebé oferese husi Embaixada Timor-Leste nian iha Singapura, iha okaziaun Loron Internasionál Feto nian no sei hala’o mós programa vizita ba fatin balun.

Remata hosi Singapura, Ministra Magno sei desloka ba Doha-Qatar, hodi partisipa iha Konferénsia dalimak País sira Menus Dezenvolvidu (LDC5, siglá-inglés), ne’ebé sei halo iha 5-9 Marsu 2023, no sei partisipa mós iha Komemorasaun Aniversáriu kategória Nasaun sira ne’ebé Menus Dezenvolvidu ba dá-la 50.

Iha vizita traballu hirak ne’e, Ministra Magno, akompaña hosi Diretór-Jerál ba Asuntu Multilaterál no Rejionál, Licínio Branco, Diretór-Jerál ba Asuntu Bilaterál, Crisogno de Araújo no  Xefe Gabinete Natalia Sarmento no membru delegasaun sira seluk.