Mediku Simu Osan Estadu, PM Xanana “Bandu” Loke Klinika

Dili, www.news-viptv.com – Primeiru Ministru (PM) Kay Rala Xanana Gusmão fo atensaun ba mediku sira ne’ebe halao knar iha hospital, “bandu” labele iha ka loke klinika.

“Se mediku ida servisu iha hospital simu osan estadu, labele iha klinika, tamba tau liu atensaun ita boot nia klinik, ita bo’ot hasai buat ne’e (reseita aimoruk, red), ba fali ita bo’ot nia klinika,” hateten PM Xanana ba jornalista sira hafoin inkontru semanal ho Prezidenti Republika (PR) Jose Ramos-Horta, Kinta (4/1/2024), iha Palasiu Prezidensial, Dili.

Xefi governu ne’e afirma, husu ba mediku saude sira no professor edukasaun sira atu tau iha hanoin katak profisaun sira nian ne’e laos servisu maibe misaun ida.

“Saude ho edukasaun ne’e misaun, laos servisu. Professor sira tenki hatene hanorin, hanorin ho domin, para kria labarik sira matenek. Enfermeiru no dotor sira tenki trata moras sira ho domin, laos dehan pronto, ita hatene ona panadol, paracetamol, tenki kuriji hotu, tamba ne’e maka hau dehan ohin ita nia estadu sei frajil, tamba institusoens estadu sedauk metin ho diak, tamba ita hotu buka maka osan det, sai boot tiha,” dehan PM Xanana.

PM Xanana mos deklara katak ba oin nia sei lao ba klinika barak hodi hare mediku sira ne’ebe loke klinika no asuntu ne’e ministra saude, inklui ministra edukasaun sei aprezenta ba Konsellu Ministru kona ba problema sira ne’ebe hasoru ne’e.

Kona ba assuntu stok ai-moru ne’ebe menus, nia husu ba publiku atu fiar nafatin ba governu hodi rezolve assuntu ne’e.

“Karik ai-moruk iha loja iha entaun bele ba sosa hodi tau iha Ospital. Hau hakarak esplika deit katak loja sira iha Dili laran ne’e mak ai moruk sei iha entaun ita ba sosa hodi tau iha Ospital. Tamba ne’e Ita tenke komprende katak ai-moruk ne’ebe ita konsumu ne’e sosa husi nasaun seluk hanesan mos Pasaporte, tamba ne’e ita presisa tempu hodi resolve,” esplika PM Xanana.

Hare no avalia ba situasaun seguransa durante selebrasaun Natal no tinan foun, xefi governu apresia ba povu hotu, liliu joventude sira ne’ebe selebra loron importante sira ho hakmatek.

Nia mos hateten juramento PNTL no F-FDTL iha duni valor ba estado, no mos iha 28 dezembro 2023 wainhira halao vizita iha Karbau no Hauba iha Munisípiu Bobonaro hodi hare rasik lia nain sira Haruka arte marsiais sira halo juramentu, nune sitauasaun agora lao normal

” Ami nia observasaun buat hothotu lao diak teb-tebes, seguransa kapas los, komportamentu povu, jovem diak teb-tebes. Parabens ba povu Timor-Leste no jovem sira no ita nia forsa defeza no seguransa ne’ebe kontribui ba situasaun periodu natal no tinan foun,” hateten PM Xanana.

PM Xanana mos espera iha período 2024 situasaun nakonu ho harmonia paz no hakmatek, hodi governu bele halao nia programa no halo dezemvolvimentu.

“Hau rasik ho primeiru ministru halo apresisaun no avaliasaun kona ba situasaun seguransa durante periodu natal, buat hotu lao diak,” afirma PR Ramos-Horta.