Lu-Olo: Hau sei la Hakruk ba Presaun Ema Ida

AILEU, www.news-viptv.com – Kandidatu Prezidenti Republika, Francisco Guterres Lu-Olo iha nia kampana moelu dialogu ne’ebe halao iha Salaun Timor Klaran, Aileu deklara nia kontinua sei la hakruk ba presaun ema ida nian satan ba partidu politiku ida.

“Hau la hakruuk ba presaun ema ida ka partidu polítiku ida nian tanba hakarak kumpre de’it konstituisaun,” dehan Lu-olo, Tersa (5/4/2022).

Atual prezidenti republika e’e mos esplika katak, Partidu CNRT ho nia koligasaun kontinua halo propaganda falsu hasoru nia hodi dehan nia violador no furador konstituisaun, maski Tribunal Rekursu deside katak laiha inkonstitusionalidade ba dezisaun ne’ebe nia halo.

“Se Tribunal (Rekursu) rasik mak deside ona laiha inkonstitusionalidade ba aktu Prezidente Repúblika nian, ita boot sira ko’alia ne’e vale saida. Ne’e atu lori halo kampaña de’it atu hasoru kandidatu ida Lú Olo ne’e,” Lú Olo esplika.

Lú Olo hateten katak to’o agora CNRT seidauk aprezenta faktus loloos atu akuza Prezidente Repúblika viola konstituisaun. Maibé uza de’it nu’udar kampaña atu hamonu kandidatu Lú Olo.

Lú Olo hateten katak la konkorda ho desizaun Prezidente Repúblika ne’e buat seluk ida maibé la respeita desizaun Prezidente Repúblika no Tribunal Rekursu ne’e buat seluk ona.

Hafoin Aliansa Mudansa ba Progresu ne’ebé rahun, CNRT lidera koligasaun foun la konsege forma Governu tanba koligasaun ne’e monu iha dalan klaran tanba KHUNTO halai ses tiha husi koligasaun ne’e ba hamutuk fali ho PLP no Fretilin fó apoiu ba Taur Matan Ruak kontinua sai Primeiru Ministru VIII Governu Konstitusionál.

Iha fatin hanesan, Adjunto Sekretáriu-Jerál Partidu KHUNTO Zeto Patricio hateten KHUNTO sei la sai traidor ba VIII Governu no sei respeita nafatin ba prezidenti republika ba kualker dezisaun.

“KHUNTO reafirma deit nia pozisaun katak, KHUNTO sei la sai traidor satán maupagador ba VIII governu konstitusionál. ho respeitu hakruk ba desizaun Prezidente Repúblika nian kuandu nia re-kandidatu ami-apoiu, KHUNTO la presiza dehan mai apoiu oinsá-oinsá, KHUNTO so hatene deit katak desizaun irarkia husi leten tun mai katak ida- deit, ita apoiu totál ba ita-nia aman Prezidente Lú Olo, tanba ne’e informa ba estrutura sira partisipa iha diálogu ne’e atu servisu maka’as ba baze vota ba ita-nia kandidatu Lú Olo. ita presiza Prezidente Repúblika ida firmi iha nia desizaun no firmi iha ita-nia hanoin ida ne’e Prezidente Repúblika hatur ona durante tinan-lima ne’e tuir lei,” dehan Zeto Patricio.

Ba militante Partidu Libertasaun Popular (PLP) Munisipiu Aileu, Kordenador PLP Munisípiu Aileu, Abel da Conceição husu nafatin ba militante no apoiantes Lu-Olo atu vota ba atual prezidenti republika ne’e ba daruak.

“Ita maioria tiha ona tanba ne’e mak VIII governu sei metin hela ne’e, nusa mak ita tenke halai tun sa’e, ha’u dehan ba ita-boot sira ita tenke servisu maka’as atu nune’e lori ita-nia kandidatu Prezidente Lú Olo ba segundu mandatu nian,” dehan Abel.

fontes: Pajina Facebook Lu-Olo Kandidatu Prezienti Republika 2022-2027