DILI, www.news-viptv.com – Membru nasaun europeia, Austria planeia ona atu loke nia konsuladu iha Kapital Dili, Timor-Leste hodi hametin liu tan koperasaun bilateral ho Timor-Leste.
Planu Austria hodi loke nia konsuladu ne’e hato’o hosi Embaixador Austria ba Timor-Leste no Indonezia, Thomas Loidl iha nia hasoru malu ho Primeiro-Ministru Kay Rala Xanana Gusmão, Kinta (30/11/2023), iha Palacio do Governo, Dili.

“Bainhira Austria loke ona Konsuladu iha Timor-Leste maka sei lori nasaun rua hametin kooperasaun diplomatiku hodi habelar kooperasaun iha área saúde no dezenvolve infra-estrutura baziku,” dehan Embaixador Thomas Loidl ba jornalista sira.
Embaixador Austria ne’e sente prevelijiu bele hasoru PM Xanana hodi koalia koperasaun diplomatiku entre nasaun rua, ne’ebe nia esplika katak nasaun rua ne’e mos nu’udar nasaun kiik iha ida-idak nian rejiaun.
Alende koalia kona ba planu loke konsuladu, Austria liu hosi nia koperasaun atual kontinua apoia Timor-Leste iha promove demokrasia no valor direitus umanu.
“Previlejiu hasoru Primeiru-Ministru, Timor-Leste no Austria hanesan nasaun kiik, no Timor-Leste pais kiik ida iha Sudeste Aziátiku, enkuandu Austria nasaun kiik ida iha kontinente Europa hakarak partisipa no promove valór demokrasia no direitus umanus,” nia dehan.
Iha tempu resistensia, Austria nasaun ida ne’ebe mos fo nia apoia ba luta independensia Timor-Leste liu hosi simu Timoroan sira hodi hakilar ba deretu independensia nian iha Europeia.
IX Governu Konstisionál define Timor-Leste nia polítika esterna ho prinsípiu ida- ne’ebé konsagra sentidu independénsia no soberania mak: “Ba Timor-Leste, Laiha Aliadu ka Inimigu, Hotu-Hotu sei Hamutuk no AMIGUS de’it!”. Ida ne’e sai hanesan Timor-Leste nia Lema, ne’ebé sei orienta ita iha Relasoens Esternas, iha Konjuntura Internasionál ida ne’ebé daudaun ne’e defisil tebes.
Maske, Timor-Leste sei joven ka sei frájil, maibé Timor-Leste iha mehi boot ho esperansa no konfiansa katak bele mantein paz, moris sosiál, hadi’a justisa no konsolida instituisaun estadu. Ida ne’e hotu nu’udar pilares fundamentais atu atrai investimentu hodi dezenvolve ita-nia setór ekonómika no hadi’ak kondisaun sosiál, husi dalan ne’ebé sustentável.