Loke Konsuladu Honorariu iha Dili, Hungaria Hakarak Fornese Bolsu Estudu ba Timoroan

DILI, www.news-viptv.com – Hungaria iha nia relasaun bilateral ho Timor-Leste, planu ona iha tinan oin hodi loke konsuladu iha Kapital Dili hodi hametin liutan relasaun diplomatika ho Timor-Leste.

“Ami planu atu loke konsuladu onorariu ida iha Timor, ka karik tinan oin mai, ami prepara hela ba ida-ne’e. Ha’u hanoin katak ida-ne’e mós importante tebes iha relasaun diplomátika katak ita iha pasu ida tan atu hametin ita-nia relasaun bilaterál sira,” hateten Embaixadora Lilla Karsay ba jornalisra sira hafoin hasoru malu ho Primeiru Ministru Kay Rala Xanana Gusmão, Segunda (24/2/2025), iha Palacio do Governo, Dili..

Alende planu loke konsuladu, Hungaria liu husi nia Embaixadora ba Timor-Leste, Lilla Karsay informa katak Hungaria hakarak fornese bolsu estudu ba Timoroan.

“Hungaria bele fornese edukasaun superiór balun, programa bolsa estudu kompletu, tamba ami iha umbrella no ami sei hare’e kualker estudante Timor-Leste hira maka potensialmente bele ba iha Hungaria no estuda iha universidade sira durante iha tinan balun,” nia dehan.

Nia mos informa, Governu Hungaria iha mos nia programa umanitária ne’ebé ajuda komunidade Kristaun sira iha mundu tomak atu hari’i ou rehabilita eskola, inklui mos ba Timor-Leste.

“Projetu sira-ne’e mak projetu eskala ki’ik liu, maibé ami fiar katak ida-ne’e bele sai hanesan inísiu di’ak tebes atu hahú kualkér kooperasaun,” hateten Embaxadora ne’e.