Liu Husi Desportu, TL Sei Promove Kultura no Diplomasia ba Mundu

DILI, www.news-viptv.com – Timor-Leste (TL) iha nia pozisaun nu’udar uma nain ba Konferensia Ministru Juventude no Desportu CPLP no XII Jogos Desportivas CPLP 2025 ne’ebe sei realiza iha 17-27 Jullu 2025, Iha Dili, sei promove kultura no diplomasia TL nian ba mundu.

“Ho kondisoes Timor nian no ita nia estado no governu hakarak promove ita nia kultura, no ita areas liuhusi jogu CPLP, ita halo diplomasia ba mundo liu husi desportu ne’e maka ita aproveita halo jogu CPLP ne’e halo diplomasia, no espera katak loron tuir mai bele iha tan kondisoes ne’ebe favoravel  ba timor atu nune’e joven barak bele utiliza fasildade diak ba aktividades desportu,” hateten Ministru Juventude, Desportu, Arte no Kultura, Nelyo Isaac Sarmento ba jornalista sira hafoin lansa offisialmente sekretariadu ba CMJD no XII Jogos Desportivas CPLP 2025 ne’ebe lokaliza iha Centro Convenções de Dili (CCD), Kinta (27/2/2025).

Lansamentu sekretariadu ne’e hetan mos prezensa husi Koordenadór Jerál ba Jogu CPLP 2025, atual Sekretáriu Estadu ba Arte no Kultura (SEAK), Jorge Soares Cristóvão, hamutuk ho Komisaun Organizadora, responsável superiór sira husi ministériu relevante, no reprezentante husi ministériu oioin, no ekipa delegasaun Komisaun Téknika Akompañamentu (CTA) ba Jogu Desportivu CPLP 2025.

Iha ninia diskursu, Nelyo Isaac esplika, sekretariadu refere importante tebes hodi garante koordenasaun efetivu no apoiu lojístiku ba Jogu CPLP ne’ebé sei realiza iha tinan 2025, inklui nu’udar sentru operasionál ba Jogu maibé mós apoia Konferénsia Ministeriál CPLP nian kona-ba Juventude no Desportu.

Sekretariadu ne’e, nia esklarese, sei sai hanesan pontu koordenasaun primáriu ba federasaun desportiva sira, ekipa téknika husi Estadu-membru CPLP nian, árbitru sira, no ofisiál sira eventu nian, hodi garante ezekusaun Jogu sira ne’ebé la’o ho di’ak.

Ho estabelesimentu Sekretariadu Desportu CPLP nian, eventu ida-ne’e marka pasu signifikativu iha preparasaun Timor-Leste nian nu’udar nasaun uma-na’in ba Jogu CPLP 2025. Ne’e reforsa kompromisu nasaun nian atu organiza ho susesu eventu desportivu internasionál ida-ne’e, hodi promove kooperasaun no solidariedade entre nasaun membru CPLP sira.

En jeral ministru esplika katak TL preparadu hodi simu atleta husi nasaun membru CPLP sira, inklui realizasaun evetos desportivas sira hanesan Futebol, Ateltismu, Para Atletismu, Karate, Taekwondo, VoleyPraia, Basket 3 on 3, Tenis Kampu no Xadres.

“Fasilidade sira TL pronto ona, no iha hela prosesu rehabiltasaun,” informa Koordenadór Jerál Jogu (CPLP), atuál Sekretáriu Estadu Arte no Kultura (SEAK), Jorge Soares Cristovão, akompaña husi Prezidente CTA, Jorge Cesar de Carvalho, ho Akompahnamentu Da Jogu Desportivu CPLP, Kinta (27/02/2025) iha CCD Kaikoli Dili.