“La Asumi Ona” Sekjer, Lere: Alkatiri Nafatin Aman Fundador FRETILIN

DILI, www.news-viptv.com – Relasiona ho kongressu nasional Partidu FRETILIN ne´ebe sei realiz aiha fulan Setembru 2022, Jeneral Reformadu Lere Anan Timur husu militante FRETILIN sira atu rekonese nafatin Mari Alkatiri nudar fundador FRETILIN wainhira la assumi ona kargu Sekretariu Jeral (sekjer).

Lere deklara lia hirak ne´e ba jornalista iha Palasiu Prezidensial hafoin hasoru malu ho Prezidenti Republika iha kuarta foin lais ne´e.

“Hau husu ba militantes FRETILIN nian, labele nega ema fundador sira. Hanesan hau dehean maun Mari fundador, sekretraiu jeral partidu, biar nia la kae sekretariu jeral partidu, mais aman ne´e aman nafatin. Bele ema seluk mak kaer mos ema seluk mak kaer laos aman, aman ne nia nafatin, ida ne´e mak nia tenki kaer iha konsiensia,” dehan Lere.

Maski sedauk forma pakote, nu´udar segundu jerasaun FRETILIN, Lere deklara nia iha ambisaun hodi okupa kargu ruma iha FRETILIN nune´e bele lori vitoria ba FRETILIN no sei ukun hamutuk ho Partidu CNRT ne´ebe lidera hosi Xanana Gusmao.

“FRETILIN tenki mana iha 2023, hau tenki okupa fatin ruma iha FRETILIN atu lori FRETILIN ba oin para hakuak líder hot-hotu, liliu FRETILIN tenki hakuak CNRT tambá Xanana iha ne´eba, tenki ukun. Partidu bo´ot labele depende ba partidu ki´ik, ki´ik maka tenki depende ba bo´ot, labebe bo´ot maka depende ba ki´ik. Sei bo´ot maka depende ba ki´ik hau hanoin ita luta ba ida-idak nia kadeira, luta ba ida-idak nia moris, mais ita la luta moris diak povo ninian, ne´e maka hau nia esforsu maka ne´e,” dehan Lere.

Partidu FRETILIN desde tinan 2000 lidera hosi Francisco Guterres Lu-Olo no Mari Alkatiri nu´udar sekretariu jeral.