Komisaun B PN Aseita Tau OJE 2026 Hadia Ro’o Naval Ne’ebe Aat

DILI, www.news-viptv.com – Komisaun B Parlamentu Nasional (PN) aseita no konkorda ona hodi tau osan manutensaun iha Orsamentu Jeral Estadu (OJE) tinan 2026 hodi hadia ro’o Naval ida ne’ebe aat ona durante tinan 2.

Ro’o Naval ne’e, esplika Vise Prezidenti Komisaun B, Luis Roberto katak importante hodi bele halo patrulla iha area tasi Costa Sul nian nune’e bele kontrola mos atividade illegal fishing.

“Illegal fishing ne’e akontese iha Costa Sul ne’eba. Ne’e ita hotu akompana katak, illegal fishing ne’e ita nia riku soin barak mak lakon. Tan ne’e ita nia forsa naval sira atu halo operasaun presiza fasilidade tamba fasilidade mak agora dadauk aat hela mak ro’o ne’e, ro’o ne’ebe ita sosa folin ne’ebe karun, tamba manutensaun ladun diak, entaun ro’o ne’e agora hakdasak hela. Ita bele dehan tinan rua ona mak paradu, tamba ne’e mak komisaun B tun ba hare direita nia kondisaun hanusa para atu preve osan ba iha 2026 nian hodi bele hadia ro’o ne’e halai fila fali,” dehan Deputadu Luis Roberto ba jornalista sira, Kuarta (19/3/2025), iha Uma Fukun Parlamentu Nasional.

Ro’o ne’ebe estadu sosa ho osan Milliaun US$ 14, antes ne’e governu anterior hamutuk ho ekipa Naval F-FDTL konsege hetan kompana husi Indonesia ne’ebe atu hadia ro’o refere, maibe la konsege no dadauk ne’e ekipa F-FDTL rekomenda ba governu atu hili kompana husi Xina mak hadia tamba ro’o ne’e nia makina ho lian Xina hotu.

Kona ba Lei Protokolu, Komisaun B mos halo ona dessimina no entrega ba governu hodi oinsa atu kria dekretu lei ou sai giaun ida bele halo kontinuasaun .