Komemora 20 de Maiu, Suku Bairo-Pite Realiza Jogu Desportu Komunitaria “Bairo-Pite Championship 2024”

DILI, www.news-viptv.com – Suku Bairo Pite realiza Kampionatu Bairo Pite Championship 2024 nu’udar jogu desportu komunitaria ba modalidade futebol salaun no futebol onze. Bairo Pite Championship ne’e organiza hodi komemora loron restaurasaun independensia 20 de Maiu.

Jogu ne’ebe partisipa deit hosi ekipa futebol aldeia iha Suku Bairo Pite laran, loke hosi Xefi Suku Bairo Pite Joaninha Soarea Alves, Sabadu (20/4/2024). iha Kampu Futebol Seminariu Ailok Laran, Bairo Pite, Dili.

Iha nia deskursu, Xefi Suku Bairo Pite ne’e husu ba jogador no adeptu sira atu respeita malu iha jogu ne’e tamba atu hametin unidade no dame entre komunidade sira, liliu joventude sira iha suku laran.

Jogu desportu komunitaria ne’e hetan apoiu fundus hosi Ministeriu Juventude, Desportu, Arte no Kultura ho sponsor seluk ne’ebe apoia mos material ba komisaun organizadora.

Aldeia ne’ebe partisipa iha jogu desportu komunitaria ne’e maka Fuslam, Niken, Frecat Xamatama, Ruin Naklekar, Moris ba Dame, Andevil, teki-Teki, Laloran, Tane Timor, Terus Nanis, Avansa, Licarpoma no Buca Fini.

Entertantu ba jogu Futsal aldeia nebe partispa maka Fuslam, Niken, Moris ba Dame, Fatumeta, Xamatama, Rai Nain, Avansa, Buka Fini, Andevil, Tane Timor, Rio de Janieiro, Ribeira Maloa no We Dalak.

Abertura ba kampionatu ne’e loke ho jogu futebol onze entre ekipa Aldeia Xamatama kontra Aldeia Ruin Naklekar ne’ebe manan hosi Xamatama ho skor 5-2.