Kardeál 133, Inklui Kardeál Timor-Leste Sei Partisipa Konklave Hili Papa Foun

DILI, www.news-viptv.com – Kardeál hamutuk 133, inklui kardeal husi Timor-Leste, Dom Virgilio do Carmo da Silva sei partisipa iha konklave ne’ebe sei realiza iha 7 Maiu hodi hili Susesór São Pedro nian tuirmai.

Vaticanu informa, ida-ne’e maka konklave dahuluk ne’ebé hala’o ho númeru liu limite eleitor 120. Bazeia ba parágrafu ida iha Konstituisaun Apostólika Universi Dominici Gregis (UDG), limite hosi kardeál sira votu nian maka 120 – liu 13 hosi saida maka Koléjiu Kardeál sira nian fó sai ona katak sei partisipa iha semana oin-mai.

Maibé, númeru Koléjiu nian dala barak liu ona limite, maski iha regulamentu sira ne’ebé estabelese ona iha UDG.

Iha loron 1 fulan-outubru tinan 1975 maka Papa Paulo VI estabelese ba dala uluk regra katak “númeru másimu eleitor kardeál sira labele liu na’in 120” iha Konstituisaun Apostólika, Romano Pontifici Eligendo. Antes ida-ne’e, iha konsistóriu tinan 1969, Koléjiu Kardeál sira nian atinji eleitór na’in 134.

Maski Papa João Paulo II konfirma regra ne’ebé limita númeru ba 120, pontífise sira kria ona kardeál barak liu ne’ebé liu númeru ne’e.

Hafoin Papa João Paulo II nia mate, konklave loke iha tinan 2005 ho Koléjiu Kardeál sira-nian ne’ebé kompostu hosi kardeál na’in 183 ho eleitór na’in 117.

Ida-ne’e kontinua ho Papa Bento XVI (Desimu seis) ne’ebé ultrapasa númeru kardeál eleitór 120 iha okaziaun rua: iha Konsistóriu 2010 no 2012.

Bainhira nia rezigna-an iha 2013 no ho konklave ne’ebé tuir mai, Koléjiu Kardeál sira nian kompostu hosi kardeál na’in 207 – na’in 117 de’it maka eleitór sira.

Papa Francisco halo tuir no halo númeru Koléjiu nian sai boot liu 120 iha konsistóriu 10 hahu tinan 2014 to’o 2024.

Maski iha istória ida ne’ebé ultrapasa numeru limitasaun nian, konklave 2025 ida-ne’e sei sai hanesan ba dala uluk ho eleitór kardeál liu 120. Koléjiu Kardeál sira nian fó sai deklarasaun ida ne’ebé rekoñese direitu hosi eleitór na’in 133 hotu-hotu sei partisipa iha konklave ne’ebé sei mai, hodi determina katak provizaun lejislativa hosi UDG hetan dispensasaun tásitu hosi Papa Francisco bainhira limite ne’ebé estabelese liu ona.

Ba dala uluk, konklave tinan ne’e sei partisipa kardeal foun husi nasaun 15 inklui Timor-Leste. Nasaun seluk ne’e maka, Haiti, Cabo Verde, Repúblika Sentru-Afrikana, Papua Nova Guiné, Myanmar, Ruanda, Tonga, Malázia, Suésia, Luxemburgu, Singapura, Paraguai, Sudaun Súl, no Sérvia.

Maibé, Europa iha nafatin pezu signifikativu iha Koléjiu Kardeál sira-nian. Kontinente tuan reprezenta hosi eleitór kardeál na’in 53 ho Itália iha nafatin númeru boot liu (19), tuir fali Fransa (6) no España (5).

Kardeál na’in 37 hosi Amérika, na’in 23 hosi Ázia, na’in 18 hosi Áfrika no na’in 4 hosi Oseánia.