Japaun Sei Fo Kapasitasaun no Apoia Ro 4 ba PNTL

DILI, www.news-viptv.com – Governu Japaun liu husi nia Japan Internasional Corporation Agency (JICA) asina ona akordu koperasaun ho Polisia Nasional Timor-Leste (PNTL) hodi fo kapasitasaun ba nia membru, inklui sei apoia ro 4 ba Unidade Polisia Maritima (UPM) ba seguransa marítima nian.

Seremonia asina akordu ne’e asina husi Komandante Jeral PNTL, Komisariu Henrique da Costa, ho Daisuke Fukumori, JICA nia Xefe Reprezentante, ne’ebe seremonia asinatura ne’e mos hetan prezensa husi Embaixador Japaun mai Timor-Leste, Tetsuya Kimura.

Objectivu sira husi projetu ida ne’e maka estabelesimentu no hasa’e kapasidade institusionál sira husi Unidade Polisia Marítima (MPU) PNTL nian ba seguransa no protesaun marítima. JICA hein atu fornese Ró Inflável ho Kasko Rijidu (RHIBs) no ekipamentu relevante, inklui motór sira, reboke ró nian, no kareta atu tula ro sira. No mos, JICA sei haruka peritu tékniku sira atu hala’o formasaun ba operasaun no manutensaun RHIB sira.

“Ita hatene difikuldade ne’ebe ita iha maka Ró atu ita nia UPM uza hodi hala’o servisu no iha tempu ne’eba Embaixador Japaun hateten katak sira sei buka meius atu nune’e bele apoiu ba ita nia UPM, hafoin ida ne’e halo diskusaun ho parte JICA ninian, sira deside katak sira pronto atu apoiu Ró ho ekipamentus balun ba UPM,” dehan Komisariu Henrique da Costa ba jornalista sira, Kuarta (9/7/2025), iha Kuartel Jeral PNTL, Dili.

Embaixadora Japaun iha Timor-Leste, Tetsuya Kimura hateten nia parte haksolok tanba hafoin halo koordenasaun extensivu, Japaun sei fó apoiu vital ba Timor-Leste nia seguransa maritima. Pakote ida ne’e inklui laos deit Ró ha’at ho dezempeñu ass, maibé mós ferramenta manutensaun esensial sira no kolokasaun péritu Japonez sira. Abordajen abrante ida ne’e ho objetivu atu hadia efetivu kapasidade sira husi UPM.

“Ami fiar katak melloramentu seguransa marítma ne’e esensial ba nasaun ida nia prosperidade no estabilidade. Fronteira maritima sira ne’ebe seguru maka importante tebes atu proteje Soberania Nasional, salva-guarda rekursu tasi nian ne’ebe valiozu, kombate aktividade illegal sira hanesan pirataria no peska illegal, no garante seguransa transporte no komersiu maritimu nian”, hateten Embaixador Japaun ne’e.

Tetsuya Kimura iha konfiansa katak Ró ha’at ho dezempeñu ass no treinamentu ne’ebe akompaña sei utiliza ho efetivu hodi reforsa seguransa kosteria Timor-Leste nian.

“Mai ita kontinua servisu hamutuk hodi garante seguransa no protesaun ba Povu Timor-Leste, hametin liu tan ita nia parseiria,” nia dehan.

Reprezentante Ministru Interior aktual Sekretariu Estadu Protesaun Sivil Domingos Mariano Reis lori governu nia naran agradese ba Governu Japaun nian apoia ba PNTL hodi asegura seguransa maritima nian.

“Hein katak ho asinatura ida ohin bele asegura seguransa maritima ninian liu husi ita nia forsa Polísia Marítima ninian hodi bele asegura katak Peska Ilegais sira labele halo movimentu iha Tasi Timor nian no mós hodi asegura katak ita nia rikus-soin iha tasi nian, ema seluk sei labele halo tuir nia hakarak iha ita nia area Tasi ninian” hateten Domingos Reis.