Independensia no Sustentabilidade Media Sai Programa Prioridade ba KI iha Lideransa Antonio Mali

DILI, www.news-viptv.com  –  Hafoin simu posse husi Prezidenti Parlamentu Nasional, Maria Fernanda lay, independensia no sustentabilidade media sai programa prioridade Konsellu Imprensa (KI) iha lideran Antonio Mali nu’udar prezidenti foun KI ba period 2025-2029.

“Asuntu ida ha’u hanoin sai hanesan preoridade mos hametin liutan independensia no sustentabilidade media nian no halo koperasaun ho parseiru sira no oinsa sira bele fo formasaun ba iha jestor media nian, liuliu jestor finanseiru sira. Para sira bele hetan finansiamentu ida ke sustentável,” dehan Antonio Mali, Prezidenti foun KI ba jornalista sira hafoin simu pose, Kinta (26/6/2025) iha uma fukun Parlamento Nacional, Dili.

Durante nia mandate iha buat 5 tuir vizaun importante liu maka reforma legal advokasia, no presija hare’e fila-fali lei sira hamutuk ho Parlamentu Nacional (PN), no Governu sira para atu garante liutan liberdade imprensa.

Nune’e mos, formasaun ba media sira. “Hasae profesionalismo iha media sira nia servisu, no kontinua halo formasaun no halo trening, Konselho imprensa mos halo, no SECOMS, i formasaun ne’e ita kopera ho parseiru sira mak hanesan universidade, no sentru formasaun sira ne’ebe agora daudauk iha Dili laran.’

KI, esplika Antonio Mali, katak KI iha redi SIPISINET ne’ebe utiliza ona iha Thailand, Indonesia no Myanmar. Ida ne’e, Timor-Leste sei loke liutan parseria ida ne’e para atu bele akomoda ezijensia no oinsa atu bele fo formasaun, atu monitor liberdade imprensa nasaun azean nian.

Iha fatin hanesan, Maria Fernanda Lay espera, lideransa KI foun bele kumpri papel KI nian nudar orgaun komunikasaun social ne’ebe iha mos dever atu aprezenta relatoriu annual ba parlamentu nasional.

“Espera, tinan ida ne’e ba oin, Konsellu Imprensa mos haruka relatoriu anual sira nian mai parlamentu, hodi halo tuir lei ne’ebe hatudu, durante ne’e laiha mais hau lakoi hare kotuk maibe ita hare ba oin, importansia Konsellu imprensa atu tau matan ba imprensa iha Timor-Leste, tamba lakleur tan ita tama ba ASEAN, oinsa preparativu ita nia imprensa ou Konselho prepara media nasional iha ne’e muitu importante formasaun kontestu ASEAN,” dehan Fernanda Lay.

Nia hatete tan katak, jornalista sira mos tenke iha vontade atu aprende lian Inglés, ho hahasa, formasaun no oinsa mak ita hatun notisia jornais.

Sekretario Estado Komunikasaun Sosial (SECOMS), Espedito Dias Ximenes hateten, KI tenki tau atensaun duni ba hanoin parlamentu nasional ne’ebe importante ida ba komunidade media husu atu bele tau matan, no oinsa bele hadia no haforsa liutan formasaun ba jornalista sira, atu nune’e notisia ne’ebe fo sai, laos deit notisia ne’ebe iha relasaun no kestaun negativo, maibe mos iha kestaun pozitivu.

“Nune’e labele hamosu duvida iha sosiedade no publiku, tantu notisia ne’ebe halo ne’e tenke liuhusi investigasaun, para nune’e la bele provoka, no duvida ho notisia,” dehan Expedito.

Lideransa foun KI ba period 2025-2029 maka Antonio Mali nudar Prezidenti no membru komisariu nain hat maka Suzana Cardoso, Benevides Correia Barros, Isabel de Jesus no Joaquim Coutinho.