Iha Presidensia Indonesia nian, PR Horta Espera 2023 TL Sai Membru ASEAN

Jakarta, www.news-viptv.com – Prezidenti Republika (PR), Jose Ramos-Horta iha nia deklarasaun imprensa konjuta espera ho Indonesia nia presidensia ba ASEAN iha 2023, bele ajuda Timor-Leste sai membro estadu ASEAN nian.

“Hau espera ho Indonezia nia presidensia iha 2023, simbolikamente bele simu ona Timor-Leste sai membro,” dehan PR Horta, Tersa (19/7/2022), iha Palasiu Prezidensial Bogor, Java Osidental, Indonesia.

Vizita estranjeiru PR Ramos-Horta ba Indonesia alende haforte relasaun bilateral entre nasaun rua, objetivu ida maka oinsa kontinua lobby nasaun fundador ASEAN ne´e bele aproxima membru estadu ASEAN sira. Vizita PR Ramos-Horta ba Indonesia mos hetan akompanamentu hosi Ministra Negosiu Estranjeiru no Kooperasaun, Adaljiza Magno.

Timor-Leste hatama nia admisaun ba ASEAN desde Marsu 2011 no dadauk ne´e iha prosesu teknika iha pilar tolu ne´ebe ba Pilar Seguransa, remata ona nia evaluasaun liu hosi misaun esploratoriu (fact-finding mission) iha tinan 2019. Nune´e mos ba pilar sosiu-kultural misaun esploratoriu mos finaliza ona sira nia vizita iha 6-9 Jullu 2022.

Dadauk ne´e, hahu Tersa ohin (19/7/202022) Timor-Leste hetan hela vizita hosi misaun esploratoriu ba pilar economia nian ga ASEAN Economic Community (AEC).

Iha fulan hira liu ba, Ministra Negosiu Estranjeiru, Adaljiza Magno mos konsege halo vizita ba Cambodia no Brunei Darussalam nu´udar politika ida hodi aproxima lideransa nasaun rua refere.

ASEAN harii iha 8 Agostu 1967 iha Bangkoke, Thailandia. Membru estadu fundador sira maka Thailandia, Indonesia, Malaysia, Singapura no Filipina.

Hafoin estabelese hosi nasaun lima, Brunei Darussalam ne´ebe jeografikamente iha Sudeste-Aziatiku ne´e deside sai membro foun ASEAN iha 7 Janieiru 1984. Tuir kedan, Vietnam iha 23 Jullu 1995, Laos ho Myanmar iha 23 Jullu 1997. Ikus Kambodia tama iha 30 Abril 1999.

Association South East Asian Nations (ASEAN) harii ho objetivu atu halais dezemvolvimentu ekonomia, social, no kultura iha rejional sudeste asiatiku, inklui mantein paz no estabilidade, respeitu lei no relasaun entre nasaun iha sudeste asiatiku.