IFC Komprimisiu Dezenvolve Parseria Setór Kafé Iha Timor-Leste

Dili, www.news-viptv.com – Atu hasa’e produsaun no realiza potensia tomak kafé Timor-Leste nian iha nivel mundial, International Finance Cooperation (IFC) komprimisiu sei dezemvolve parseria setór Kafe iha Timor-Leste.

Reprezentante Residensia IFC iha Timor-Leste, David Freedman afirma IFC sei servisu hamutuk ho entidade sira seluk, inklui ministériu sira governu nian, ajénsia dezenvolvimentu, no setór privadu atu rezolve kestaun sira ne’ebé limita kreximentu no kompetitividade kafé Timor-Leste nian.

“Komitmentu husi enkontru ohin ne’e mak ba oin IFC sei koopera ho entidade sira seluk atu dezenvolve konseitu no mós proposta ba inistiva sira oinsá ita bele hadia kafé iha futura,” dehan David Freedman ba jornalista sira hafoin hasoru malu ho Prezidenti Republika, Jose Ramos-Horta, Sexta (5/1/2023).

Iha nia hasoru malu ho PR Ramos-Horta, xefi estadu preokupa uitoan kona-ba produsaun no mós kona-ba padraun moris ba to’os na’in kafé, inklui kona-ba asesu ba merkadu no espera liu hosi esforsu hamutuk, setór kafé Timor-Leste nian bele sai motór ida ba kreximentu ekonómiku sustentavel iha nasaun ne’e.

IFC, esplika Freedman, durante ne’e servisu parseiru ho setór privadu sira iha Timor Leste, no IFC nia natureza mak nia ajensia internasionál ne’ebé foka ba dezenvolvimentu setór privadu ho objetivu atu kontribu ba dezenvolvimentu ekonómiku mas liu husi dezenvolvimentu setór privadu.

“Iha Timor Leste, ami koopera ho ajensia finanseiru sira, liu-liu mikro finansas, Kaebauk no mós Moris Rasik, ami mós koopera ho governu hodi hadia ambiente negósiu no mós atu dezenvolve projetu BIP inkluidu Portu Tibar,” dehan Freedman.

IFC mos observasa katak, maski Timor-Leste seidauk konsege dezenvolvimentu setór privadu to’o nivél ne’ebé hakarak, IFC tenta nafatin koopera ho entidade sira hotu ne’ebé relevante atu aselera prosesu dezenvolvimentu setór privadu no mós setór finanseiru.