Ho Lideransa PM Xanana, Xefi Estadu Fiar Setor Saude sei Diak Liu tan

Dili, www.news-viptv.com – Prezidente Repúblika, José Ramos-Horta fiar katak iha lideransa Primeiru Ministru (PM) Kay Rala Xanana Gusmão setor saude sei diak liu tan.

Xefi Estadu informa asuntu ne’e wainhira halo vizita ba Hospital Nasional Guido Valadares (HNGV) hodi hare dereta kondisaun pasiente no fasilidade saude, inklui fahe sasan Natal ba pasiente no labarik vuneravel sira.

“Hau fiar ho lideransa Maun Bo’ot Xanana, setor saude sei diak liu tan ba oin,” dehan PR Ramos-Horta ba jornalista sira iha HNGV Bidau, Dili, Tersa (19/12/2023).

Nia mos apela ba Ministra Saude, Elia dos Reis Amaral atu badinas hodi hadiak servisu saude nian, tamba setor saude hola papel importante iha governasaun, hanesan mos setor edukasaun.

PR Ramos-Horta ne’ebe akompana Ministra Saude iha vizita hare duni hospital hasoru problema iha makina fase ran ne’ebe hamutuk makina 14 la funsiona ho diak no fo impaktu ba pasiente sira atu trata sira nia moras iha fase ran nian.

Iha parte seluk xefi estadu husu nafatin ba governu bele tau orsamentu bo’ot ba setor saude nune’e bele halo HNGV bele iha nivel hanesan ho hospital rai liur sira.

“Hau nia vizita ba HNGV ida ne’e, Hau hare diak iha tinan hira nia laran ne’e diak no kompara ho tinan sanulu liu ba. Mais, estado ho governo tenki tau orsamento ne’ebe bo’ot liu tan par halo hospital ne’ebe nivel hanesan Bali, Singapura, tamba ita nia nasaun independent, soberano no tinan rua nulu resin ona atu tama ASEAN tenki iha hospital ne’ebe moderno,” dehan PR Ramos-Horta.

Ema numeru ida iha nasaun ne’e mos hateten, vizita ninian iha HNGV laos ba dahuluk, maibe bebeik ona hodi kontinua tau atensaun ba setor saude, liliu iha atendementu no fasilidade.