Hetan Ultimatum Israel Hamamuk Gaza, Rezidente Miliaun 1 Resin Paniku

DILI, www.news-viptv.com – Populasaun Palestina iha Gaza tauk no paniku hafoin military Israel fo ordem ba ema hotu atu sai hosi Gaza iha oras 24 nia laran desde Sexta (13/10/2023)

Oras balun depois ultimatum Israel nian ne’e, populasaun iha Gaza halot sira nia sasan ne’ebe bele lori hodi evakua ba parte sul ho kareta no transporte ne’ebe iha.

Sira ne’ebe laiha transporte, tenki lao ain, no balun hamrik iha dalan ninin hodi hein kareta ne’ebe posibilidade bele tula sira.

Iha area balun, Estrada sira mamuk no residente sira hili nafatin hela iha sira nia uma hodi deside saida maka tenki halo depois ordem evakuasaun Israel nian.

“Ema barak husu, ne’e loos ga, mehi aat ou saida,” dehan Safwat al-Kahlout hosi Al Jazeera.

Nia hateten, “To’o agora ema sira fiar katak ne’e hanesan funu psikologia, sira lakohi fiar.”Al-Kahlout esklarese, laiha preparasaun atu evakua sai hosi Gaza, satan ema barak maka laiha transporte hodi muda.”Iha pratika, ema miliaun 1,1, sira laiha fasilidade hodi migrasaun, oinsa sira bele migrasaun? Kuda buru? Sira laiha kuda buru ne’ebe sufsiente. Kareta? Kareta mos la to’o. Dadauk ne’e laiha kombustivel hodi lao to’o loron hitu,” nia dehan.

“Ema Palestina liu miliaun ida paniku, konfundi, laiha planu, no la komprende saida maka tenki halo. Agora hau nia oan mos husu, ba ne’ebe ita tenki ba?, hau hatan, hau la hatene,” nia esplika.

Entertantu, ofisial ida iha ajensia refujiadu ONU nian iha Palestina iha Sidade Gaza, Inas Hamdan imajina situasaun refere hanesan barullu. Residente sira la hatene saida maka tenki halo. Nia mos hateten, imposibel halo evakuasaun ne’ebe seguru ba ema miliaun 1,1.

Porta-voz Palestine Red Crescent iha Gaza, Nebal Farsakh, hateten iha pasiente ne’ebe labele muda iha kondisaun atual no mediku barak maka rejeita hodi ba no husik sira nia pasiente no hateten ba sira nia familia liu hosi telefoni katak sira sei la evakua.