Hetan Troka hosi Xefi Bankada, Olinda Guterres: Naimori Hau La Gosta

DILI, www.news-viptv.com – Eis Xefi Bankada Partidu Kmanek Haburas Unidade Nasional Timor Oan (KHUNTO), Deputada Olinda Guterres hirus no la gosta dezisaun Konselleiru KHUNTO, Jose dos Santos Naimori Bucar ne’ebe troka nia pozisaun.

Ho dezisaun ne’ebe Naimori halo ba nia, nia hateten Naimori la konsidera ona nia no halo hanesan boneka.

“Señor Naimori tau hau hanesan boneka, dudu hau ba karuk hau mai tuir, dudu hau mai los hau mai tuir, maibe señor Naimori nia haruka hau ne’e halo saida? Hau sente todan tebes, hasai hau mos respeita la iha mai hau, antes ne’e mos hatama hau iha xefe bankada hau mos la obriga no laos hau mak husu,” dehan Olinda Guterres ba jornalista sira, Segunda (12/02/24) iha edifisiu Bankada KHUNTO, Parlamentu Nasional.

Iha plenaria ohin (Segunda, red), Prezidente Parlamentu Nasional Fernanda Lay halo leitura ba karta subtituisaun Xefe Bankada KHUNTO, Deputada Olinda Guterres troka Deputado Antonio Verdial de Souza Gama nu’udar Xefi Bankada foun. Entertantu Deputado Antonio Verdial da Silva Fereira no Deputadu Luis Roberto asumi nafatin kargu vise bankada dahuluk no daruak.

Wainhira plenaria helo leitura refere, Deputada Olinda Guterres halo reasaun hirus hodi hatete,“Agora ba oin ne’e hau hirus tebe-tebes tamba hasai derepenti, hanesan Naimori ne’e hau la gosta tamba la konsidera hau.”

Ba jornalista mos nia hateten, “Hau la gosta senor Naimori halo buat ida hanesan ne’e bele troka hau nu’udar xefe bankada, maibe tenki konsultasi ho hau no mos deputadu sira ne’ebe tur iha parlamentu laos halo karta diretamente ba Prezidente Parlamentu Signifika ne’e saida?”.

Nia esplika, lolos, nia tenki simu karta uluk hodi substitui nia pozisaun nune’e hamutuk deputadu KHUNTO seluk bele halo dezisaun hamutuk.

“Halo karta ba Prezidente Parlamentu tenki liu husi ami nia bankada hafoin bankada fo hatene mai, Ami tuir enkontru ida hodi ami bele foti nia ema ida bele sai fali xefe bankada la buat ida hau la hamrok ba poder, tenki fo hatene karta ida mai bankada tamba bankada mak integra fali mai ami nain lima ne’e mak mai bele hili fali,” dehan deputada ne’e hodi hateten Naimori maupagador.