Hasoru PM Xanana, Embaixador Alex Tilman Prontu Lori Misaun TL iha Singapura

DILI, www.news-viptv.com – Embaixador Timor-Leste bai ha Singapura, Alex Tilman hasoru Primeiru-Ministru (PM) Kay Rala Xanana Gusmão hodi simu orientasaun hosi xefi governu relasiona ho nia kargu nu’udar embaixador.

Iha nia inkontru ho PM Xanana, Embaixador Alex Tilman pronto lori misaun Timor-Leste nian relasiona ho programa IX Governu Konstitusional durante nia mandate iha Singapura, inklui oinsa tau matan ba Timoroan sira ne’ebe sempre halo tratamentu saude iha nasaun fundador ASEAN ne’e.

“Ohin hau hasoru Primeiru-Ministru tamba segunda hau aranka ba Singapura. Iha enkontru ohin ne’e, hau atu rona prioridade governo nian saida mak ita nia misaun Singapura presiza halao, tamba ne’e ohin hau rona prioridade barak hanesan adezaun ba ASEAN, ita nia koperasaun bilateral ho Singapura, area formasaun ba profisionais sira no mos relasaun ekomikus,” esplika Alex Tilman ba jornalista sira, Sexta (16/2/2024), iha Palacio do Governo, Dili.

Nu’udar reprezentante estadu iha Singapura, Embaixador Alex Tilman mos sei esforsu hodi lori investidor hosi Singapura sira ne’ebe hakarak investe iha Timor-Leste.

“Klaru ne’e konserteza katak investidor hotu hotu sempre buka oportunidade wainhira oportunidade iha ita nia nasaun iha atu investe sira sempre mai. Ita nia misaun iha ne’eba sempre prontu atu hato’o Informasaun saida deit mak investidor sira presiza atu nune’e sira hakarak mai. Ne’e mak ita nia papel ida atu asegura informasaun ne’ebe los kona ba ita nia lei, ita nia ambiente komersiu ho kompetensia ekonomia ne’ebe ita bele oferese,” dehan embaixador ne’e.

Nia mos sei kaer metin hanoin PM Xanana ne’ebe husu atu halao servisu ne’ebe independente, responsabilidade no lealdade ba nasaun.

Hafoin hasoru malu ho PM Xanana, Embaixador Alex Tilman mos ba hasoru malu ho Prezidenti Republika (PR), Jose Ramos-Horta hodi koalia assuntu hanesan relasiona ho nia misaun iha Singapura.