Haruka Traballador, Timor-Leste Hein Aprosaun husi Governu Nova Zelandia

DILI, www.newsviptv.com – Hodi haruka traballador Timoroan ba Nova Zelandia, Timor-Leste sei hein aprovasaun husi Governu Nova Zelandia.

Ba jornalista sira hafoin hasoru Prezidenti Republika, Jose Ramos-Horta, eis embaixadora Timor-Leste ba Nova Zelandia, Felicidade de Sousa Guterres esplika, wainhira hetan ona aprovasaun husi Governu Nova Zelandia, Timor-Leste bele haruka ona traballador hodi servisu iha Maiu 2025.

“Antes hau nia misaun ne’e remata atu fila, hau haruka karta ida ba SEFOPE para bele haruka ona ninia tekniku ofisial sira ba Nova Zelandia para bele trata asuntu akordo tekniku ninia para depois oinsa bele ita rekruta traballador husi Timor-Leste nian ba Nova Zelandia,” dehan Embaixadora Felicidade, Tersa (19/11/2024), iha Palasiu Prezidensial.

Embaixadora ne’e esplika tan, iha nia servisu diplomasia ba traballador nian Timor-Leste hakarak traballador Timoroan sira ne’e fila ba Timor-Leste laos deit lori osan, maibe lori mos skill. Tamba ne’e iha ona konkordansia katak traballador Timoroan sei uza oras deit 30 husi oras 40 kada semana ne’ebe aplika iha Nova Zelandia no oras 10 sei uza ba formasaun oioin.

Alende koalia assuntu traballador Timoroan ne’ebe sei servisu iha Nova Zelandia, iha nia hasoru malu ho PR Ramos-Horta relata mos servisu seluk ne’ebe nia konsege halo durante tinan 3 hanesan kooperasaun amizade entre veteranus nasaun rua, no bolsu estudu ba Timoroan sira ne’ebe dadauk ne’e estuda hela iha Nova Zelandia, inklui formasaun ba membru F-FDTL sira.