Hahan Animal Sai Problema iha Timor-Leste

DILI, www.news-viptv.com – Primeiru Ministru Taur Matak Ruak informa hahan animal sai problema iha Timor-Leste liliu ba sira ne´ebe hakiak animal.

Xefe Governu koalia asuntu ne´e wainhira lansa Sentru Fini Ikan Nila ne´ebe konstrui hosi Empreza Keshavarsz Great Timor Unipessoal Ld ne´e harii ho modelu parseiria publiku-privadu iha Heral, Dili, Sexta (17/3/2023).

Ho problema ne´e, xefi governu dezafia Ministériu Agrikultura no Peskas para serbisu ho parseiru sira buka solusaun tanba projektu sira hanesan ne’e nia sustentabilidade ba tempu naruk.

“Problema boot ida iha projektu ida ne’e no projektu sira seluk realmente hahan animal no ikan sira nian, ha’u hakiak animal nune’e ha’u hateten hahan laiha, animal mate hotu,” dehan PM Taur Matan Ruak iha komunikadu imprensa ne´ebe hasai hosi Gabinete Media PM.

PM Taur konta hikas wainhira sei Prezidente Republika nia  iha fahi 101, kada vez ké hahoris 60 to’o 70. “hahan laiha mate hotu, agora ha’u hakiak bibi 70 resin hahan laiha ha’u evakua tiha ba Metinaru, portantu hahan ne’e problema ida, ha’u dezafia Ministériu Agrikultura serbisu ho ita-nia parseiru sira para hetan solusaun ba problema ida ne’e, natuaralmente sé ita hakarak reforsa ita-nia projektu sira ne’e iha problema naturalmente problema sira ne’e kritiku ne’e ita tenke rezolve, sei ita la rezolve bele kompromete nia sustentabilidade iha tempu naruk tanba ne’e ha’u hakarak fó parabéns ba ekipa tomak”.

Xefi governu mos louva Empreza Keshavarsz Great Timor Unipessoal Lda ne’ebe iha mudansa signifikantes tebes iha área produktividade animal ninian hanesan hakiak bibi, manu, ikan, manu rade, karau no seluk tan.

“Ha’u kontente los partisipa iha serimónia ida ne’e, hanesan Sua Eminensia ohin dehan nia koñese 2019, ha’u 2021, i ha’u agora mai dala haat ona, ha’u empresionadu tal maneira projektu ida ne’e evolui, fofoun ha’u mai kikoan iha ne’ebá, mai tan aumenta ohin ha’u empresionadu loos ba nia dezenvolvimentu, ne’e primeiru hatudu katak senór ne’e iha vokasaun gosta serbisu ne’e nia halo, segundu iha parseiru sira, ne’ebé kontribui hakat iha tempu ida badak i entaun ha’u hakarak e nome pesoal i nome Governu agradese parseiru dezenvolvimentu sira hotu nia kontribuisaun ne’ebé partilla ho Ministériu Agrikultura, modelu ida ne’e modelu Parseria Públiku Privadu iha fatin seluk nasaun seluk nia la susesu maibé iha Timor hare’e katak nia progresaun di’ak bele iha futuru fó rezultadu di’ak ba dezenvolvimentu Timor nian ne’e hahú husi portu Tibar, nune’e Governu komprometidu para promove ajuda modelu ida bele hametin tan halo espansaun ba área sira seluk”, dehan PM Taur.