Hadia Sistema Justisa, Timor-Leste ho Portugal Sei Renova Akordu

DILI, www.news-viptv.com – Atu hadia sistema justisa iha Timor-Leste, Governu Timor-Leste ho Portugal sei renova akordu iha asinatura no konteudu balun kona ba knar juiz sira ne’ebe mai husi Portugal.

Ba renovasaun akordu ne’e, Primeiru-inistru Xanana Gusmão informa, Ministra Justisa Portugal Rita Alarcão Júdise sei mai vizita Timor-Leste iha Sesta (07/06/2024).

“Ho prezensa Ministra Justisa Portugal nian sei renova asinatura akodu ida ho mudansa oitoan iha konteúdu maka Juis sira ne’ebé mai hosi Portugal la’ós atu servisu fali hodi kaer prosesu sira, hakerek akordaun sira ne’ebé juis Timoroan sira la komprende Lian Portuges bá asina de’it, no ikus mai sala hotu,” dehan PM Xanana.

Objetivu ida ba renovasaun ne’e maka oinsa hadia sistema justisa hodi hare’e Defensór Públiku sira Estadu mak selu maibé la’ós defende vítima vulnerável no defende fali ema ne’ebé iha osan.

“Ezemplu mak kazu kona-ba rai. Iha defensoria sei fó apoiu liu bá órden advogadu hodi harii órden advogadu ne’ebé di’ak. Alende ne’e apoia iha Ministériu Públiku no Tribunál sira,” dehan xefi estadu ne’e.

Iha hadia sistema justisa, governu mos oferese ona bolsu estudu bá joven Timor-oan sira feto no mane, halo teste didi’ak atu sira estuda direitu iha Portugal, tanba lian Portugés baibain ko’alia bele di’ak maibé kuandu to’o ona Lei nian maka tenke komprende di’ak liu tán.