banner 1000x250

Governu Suspende Atividade Relojioza no Transporte Publiku Durante Konfinamentu Domisiliariu Jerál iha Dili

  • Share
Inkontru Konsellu Ministru. Photo Media GPM
banner 728x90

DILI, news-viptv.com – Hahu tuku 00:00, 27 Agostu 2021 governu sei implementa konfinamentu domisiliariu jerál ba populasaun iha Munisipiu Dili to’o 2 Setembru 2021.

Tuir dezisaun Konsellu Ministru 25 Agostu 2021, iha implementasaun konfinamentu domisiliariu jeral iha Dili ne’e impoen konfinamentu dimisiliáriu jerál ba ema hotu ne’ebé maka hela ka agora daudaun iha Munisípiu Dili, ne’ebé tenke hela iha sira-nia uma ka iha sira nia alojamentu temporáriu, ne’ebé inklui sentru akollimentu, exetu iha situasaun ne’ebé prevee iha diploma ne’e, liuliu tanba razaun saúde, serbisu, asesu ba sasán no servisu nesesidade bázika nian no simu vasina kontra COVID-19.

banner 1000x250

“Iha área hotu-hotu munisípiu Dili nian, bandu atu transporte públiku, liuliu táxi, mikrolete, biskota no anguna halo sirkulasaun; Suspende selebrasaun relijioza koletiva, no bandu mós atu hala’o serimónia fúnebre ne’ebé envolve partisipasaun ema na’in sanulu liu, sira ne’ebé, durante serimónia ne’e rasik tenke uza máskara oin nian hodi taka inus no ibun no mantein distánsia, pelumenus metru ida ho ema seluk ne’ebé prezente iha serimónia ne’e,” hakerek dezisaun Konsellu Ministru nian ne’e.

Estabelesimentu komersiál, industriál, artezanál ka prestasaun servisu nian taka ba públiku, ho exesaun ba estabelesimentu sira ne’ebé autoriza iha Rezolusaun Governu ne’e, liuliu estabelesimentu ne’ebé fa’an ai-han no sasán nesesidade bázika nian, eletrisidade, telekomunikasaun, prestasaun kuidadu médiku, farmásia, postu kombustivel nian, no instituisaun finanseira sira.

Restaurante sira bele fornese hahán iha rejime take away ka entrega iha uma de’it no estabelesimentu sira-seluk ne’ebé taka ba públiku bele dezenvolve ninia atividade liuhusi servisu entrega ba uma de’it.

Vendedór ambulante ba sasán alimentár no sasán ba nesesidade bázika bele mantein sira-nia atividade. Merkadu sira munisípoi nian, Manleuana no Taibessi, mantein ninia funsionamentu, husi tuku 6 dadeer to’o tuku 6 loro-kraik.

Implementasaun konfinamentu domisiliariu jeral ne’e governu implementa hafoin  Konsellu Ministrus hala’o sorumutuk iha Palásiu Governu, iha Dili, hafoin analiza aprezentasaun ba pontu situasaun epidemiolójika nasionál, husi Koordenadór Sala Situasaun Sentru Integradu Jestaun, aprova Dekretu Governu kona-ba medida sira ezekusaun Deklarasaun Estadu Emerjénsia nian, ne’ebé efetua husi Dekretu Prezidente Repúblika n. 69/2021, loron 24 Agustu, hodi hatán ba pandemia COVID-19.

Estadu emerjénsia, ne’ebé renova ona, abranje ba territóriu nasionál tomak no vigora entre tuku 00:00 husi 31 Agustu 2021 to’o tuku 23:59 loron 29 Setembru 2021.

Kompara ho medida sira ezekusaun estadu emerjénsia anteriór nian rejista alterasaun ida, ne’ebe oras ne’e bandu, iha territóriu nasionál tomak, atividade sira hotu ne’ebé implika halibur ema barak.

Regra sira seluk mantein, liuliu obrigasaun ba indivídu sira hotu ne’ebé hela iha Timor-Leste atu mantein distánsia, pelumenus, metru ida ho ema seluk ne’ebé la hela iha ekonomia komún. Kontinua obriga atu utiliza máskara oin nian ne’ebé taka inus no ibun bainhira hakarak tama ka hela iha fatin públiku ka privadu hirak ne’ebé ema hotu uza no fase liman bainhira hakarak tama ba estabelesimentu komersiál sira, industriál ka prestasaun servisu sira-nian ka ba edifísiu sira iha ne’ebé servisu administrasaun públika nian funsiona.

Durante estadu emerjénsia, lisensa, autorizasaun, vistu no autorizasaun rezidénsia no ato administraativu sira seluk sei válidu nafatin la depende ba nia prazu validade.

Iha inkontru Konsellu Ministru ne’e mos aprova mós projetu Rezolusaun Governu nian ba: Ne’ebé impoen serka sanitária iha munisípiu Dili no Ermera to’o tuku 23:59 loron 13 Setembru;

Ne’ebé impoen serka sanitária iha munisípiu Baucau no Covalima hahú husi tuku 23:59 loron 26 Agustu 2021 to’o tuku 23:59 loron 8 Setembru 2021. Ne’ebé mantein impozisaun serka sanitária iha no inklui área sira husi Suku Naimeco, iha postu administrativu Pante Macassar, no suku Bobometo, iha postu administrativu Oesilo, suku sira ne’e iha Rejiaun Espesiál Oe-Cusse Ambeno to’o tuku 23:59 loron 8 Setembru.

Bandu mos sirkulasaun ema sira-nian entre área no munisípiu sira ne’ebé refere ona no sirkunskrisaun administrativa sira-seluk, exetu iha kazu hirak ne’ebé nia fundamentu forte tanba razaun sira seguransa públika, saúde públika, asisténsia umanitária, manutensaun ba sistema abastesimentu públiku ka razaun seluk ne’ebé presiza atu hala’o ba interese públiku nian. La inklui iha proibisaun sirkulasaun ida-ne’e indivíduu sira ne’ebé komprova vasinasaun kompleta (doze rua) kontra COVID-19, no mós ba labarik sira ho idade tinan 6 mai kraik ne’ebé akompaña.

Aprova mós projetu Rezulusaun Governu ne’ebe mantein Konfinamentu domisiliáriu jerál ba populasaun iha postu administrativu Ermera no Railaco, iha munisípiu Ermera, to’o tuku 23:59, loron 1 Setembru.

Nune’e, bandu nafatin sirkulasaun ema sira-nian entre postu administrativu sira ne’e no sirkunskrisaun administrativa sira-seluk, exetu iha kazu hirak ne’ebé nia fundamentu forte tanba razaun sira seguransa públika, saúde públika, asisténsia umanitária, manutensaun sistema abastesimentu públiku, ka razaun seluk ne’ebé presiza atu hala’o ba interese públiku nian. La inklui iha proibisaun sirkulasaun ida-ne’e indivíduu sira ne’ebé komprova vasinasaun kompleta (doze rua) kontra COVID-19, no mós labarik sira ho idade tinan 6 mai kraik ne’ebé akompaña indivíduu sira ne’e.

  • Share

Leave a Reply

Your email address will not be published. Required fields are marked *

error: Content is protected !!