EUA Laiha Interese Halo Baze Militar iha Baucau

DILI, www.news-viptv.com – Relasiona ho rehabilitasaun konjunta Aeroportu Baucau ne’ebe finansia ho osan miliaun US$ 10.6 hosi Estadu Unidos Amerika (EUA) laiha intensaun atu halo baze militar iha Baucau.

“Hau bele esplika uituan katak informasaun falsu ida nee lalos, hau bele garantia, UEA laiha interese nem uituan atu halo baze militar iha Baucau,” dehan Tom Daley iha Forum Klabis ho jornalista sira ne’ebe halao iha Embaixada EUA, Pantai Kelapa, Dili, Kuarta (26/1/2022).

EUA apoiu miliaun US$ 10.6 ba reabilitasaun konjunta aeroportu Baucau no apoia Komponente Aero F-FDTL nian iha Juñu 2021.

“EUA konkorda ho governu Timor-Leste hodi lansa reabilitasaun konjunta aeroportu Baucau. Projetu ho orsamentu millaun $10.6 ne’e sei ajuda governu Timor-Leste superviziona diak liu tan ninia teritóriu, responde ba dezastre natural no promove dezenvolvimentu ekonómiku,” dehan Daley.

Iha rehabilitasaun aeroporto ne’e, Tom Daley esplika sei halo lutu perimetru aeroportu nian no harii armazem iha area aeroportu hodi rai ekipamentu no sasan ne’ebe utiliza ba atividade aeroportu nian, inklui armazem ba kareta bombeiru no komustivel.

Iha forum refere, Tom Daley mos esplika iha membru F-FDTL nain 16 maka sei ba tuir formasaun iha EU ba kursu professional military, pilotu atu halo navegasaun ba aviaun Cessna aircraft.

EUA mos promote sei oferese aviaun tipu Cessna 206 ba Governu Timor-Leste hodi halo operasaun iha Aeroporto Baucau.