Estadu Kondekora Pe. Domingos Maubere ho Orden Nicolau Lobato

DILI, www.news-viptv.com – Estadu liu husi parada militar halot ona Saudozo Pe. Domingos da Silva Soares “Maubere” iha Semiteriu Jardim dos Padre Maloa, Ailok Laran, Dili, Segunda (19/5/2025).

Seremonia funeral hahu ho misa misa requem ne’e prezide husi Prezidente Republika Demokratika Timor-Leste, Membru Governu, Membru Parlamentu Nasional, Eis Titulares sira, Arsebispu Arkidioseze Metropolitana Dili, Dom Virgilio Cardeal do Carmo da Silva, hamutuk ho Prezidente Konferénsia Episkopál Timorense no Bispu Dioseze Maliana, Dom. Norberto do Amaral no Bispu Diocese Baucau Dom Leandro Maria Alves akompaña padre sira husi Dioseze tolu.

Iha misa ne’e Estadu Timor-Leste mos atribui medalla Ordem Nicolau Lobato ho Titulu Póstum husi Presidente Republika Demokratika Timor-Leste José Ramos-Horta ba saudozo Pe. Domingos da Silva Soares “Maubere” nu’udar rekuñesimentu ba saudozo nia luta ba Independensia Timor-Leste.

Iha nia deskursu, xefi estadu hateten, Timor-Leste ho nia povu lakon amu lulik ida ne’ebe durante nia moris sempre hamutuk ho povu lian laek sira hodi hasoru poder mundu sira, liliu ba resistensia Timor-Leste nian iha prosesu ukun rasik an. Nia moris ho ema kiak sira, defende ema vulneravel sira no komprometidu ba justisa.

Repezenta Igreja Katolika, Dom Virgilio Cardeal do Carmo da Silva hateten, Amu Du nu’udar amu lulik hatudu nia domin ne’ebe klean ba Nai Maromak liu husi nia dedikasaun servi igreja durante nia vida moris nian.

Maski haknar an nudar Maromak atan, Amu Du mos hetan rekonesementu husi estadu ba nia dedikasaun durante luta ba ukun rasik an iha tempu okupasaun Indonesia nian.

Amu Du Hakotu is ho tinan 73 iha Hospital Nasional Guido Valadares tamba sofre infesaun pulmonar.

Iha nia misaun Igreja Katolika nian, Amu Du hahu nia misaun iha Braga Portugal, Ossu-Baucau, Suai-Covalima, Letefoho-Ermera no ikus desde tinan 2018 halao misaun iha Paroquia do Sagrado Coração de Jesus-Becora, Dili.