Embaixada Cuba ho MJDAK Realiza Festival Desportu Caiman to Caiman ba Dahat

DILI, www.news-viptv.com – Hodi komemora koperasaun bilateral entre Cuba no Timor-Leste ba tinan 22, Embaixada Cuba iha Timor-Leste servisu hamutuk ho Ministeriu Juventude, Desportu, Arte no Kultura, realiza Festival desportiva dahat Caiman to Caiman, Sabadu (1/6/2024).

Festival desportu ne’e hahu ho marsa paz husi edifisiu Embaixada Cuba iha Farol to’o resintu Ministeriu Juvetude, Desportu, Arte no Kultura. Alende ne’e, durante festival mos aprezenta modalidade desportu oioin hanesan jinastika aerobik, boxe, karate, basket ball, futsal, volleybol, xadres no iha mos tratamentu saude hodi koko tensaun.

Estudante iha Universidade Nasional Timor Lorosa’e husi Fakuldade Medisina no Edukasaun Fizika no Desportu senti kontenti bele partisipa iha atividade ne’e no diak ba saude.

Nune’e mos, Maria Dias nu’udar responsavel ba ferik-katuas sira iha Igreja Sagrado Kurasaun de Jesus hateten festival ne’e diak los ba ferik-katuas sira tamba bele halo ezersizu desportu ba saude isin nian.