Ema 3 Mate Tan ba COVID-19, Numeru Ativu Sa’e ba 2.141

DILI, news-viptv.com – Timor-Leste rejista ona ema mate hamutuk 33 tamba COVID-19, hafoin relata tolu tan mate iha Domingu (15/8/2021) no numeru ative sa’e makas ba 2.141.

Numeru ativu ne’e sa’e tan, hafoin sentru integradu jestaun krizi (SIJK) rejista kazu foun hamutuk 117 ne’ebe nain konfirmadu pozitivu 68 hosi Dili, Covalima 15, Baucau 13, RAEOA 10, Aileu 6, Liquisa 6, Manufahi 5, Ainaro 3, Bobonaro 3, no Viqueque 1.

Kordenador Forsa Tarefa ba Pevensaun No Mitigasaun Surtu COVID-19 iha Timor-Leste, Dr. Rui Maria de Araujo relata katak mane ida ho tinan 60 ne’ebe diagnostiku iha 15 Agostu, no mane ida tan ho idade 76 ne’ebe diagnostiku iha 14 Agostu, no feto ida ho idade 63 ne’ebe diagnostiku iha 12 Agostu hakotu iis hotu iha sala izolamentu Vera-Cruz, Dili.

“Familia kordena ho parte saude atu hala’o funerariu tuir protokolu saude ne’ebe adopta iha Timor-Leste,” dehan dr. Rui Araujo iha komunikadu imprensa ne’ebe publika iha Segunda (16/8/2021).

Alende relata numeru mate foun, SIJK mos informa numeru sira ne’ebe rekuperadu hamutuk nain 41.