Eletrisidade Lakan-Mate, CNRT Lamenta ho EDTL no Husu Rezigna Aan

DILI, www.news-viptv.com – Situasaun eletresidade iha Kapital Dili liliu iha area Comoro ne’ebe sempre lakan-mate lori Bankada CNRT liu husi nia Deputada Cedeliza Faria Dos Santos levanta kestaun ne’e iha plenaria Parlamentu Nasional hodi la menta ho servisu EDTL ne’ebe responsabiliza ba servisu eletresidade nian.

Ho situasaun eletresidade ne’ebe kontinua lakan mate, deputada ne’e husu ba Prezidenti EDTL karik laiha kapasidade ona no labele rezolve problema refere diak liu rezigna an husi ia kargu.

“Tan ne’e ha’u husu ba Lideransa ida iha elektrisidade ne’eba, karik hanusa los mak ita bo’ot sira husik hela de’it nia iha neba, ami akompana komisariu ida nia servisu liu fali prezidente EDTL, komisariu ida mak lor-loron iha terenu deit, Prezidente transa tia ain iha ne’eba, se Prezidente EDTL nia la mampu karik, diak liu nia rezigna an de’it ona, duke nia halo povu barak terus tamba deit hahalok sira ne’e,” levanta Deputada Cedeliza, Segunda (10/2/2025), iha Parlamentu Nasional.

Problema eletresidade ne’ebe lakan-mate, fo impaktu ba atividade ekonomia no finansas ne’ebe sempre liga ho eletresidade, inklui negosiante kiik sira tenki lakon sira nia sasan eletroniku ne’ebe avaria tamba eletresidade ne’ebe lakan-mate.

“Hau hanoin katak sira iha parte Komoro hatene muito bem katak eletrisidade iha ne’eba lakan mate, estraga hotu ema nia sasan barak. Bisnis ki’ik oan sira ne’e fan hanesan ice-cream, serveti caramelo ne’e mos presiza eletrisidade, edifiisiu bo-bo’ot se bele iha jerador ba kobre, maibé ita nia povu ki’ik oan sira ne’e kuitadu nia bisnis k’iik oan sira ne’e nia tenki lakon ninia retornu ba ninia loron ida-idak,” hateten Deputada Cedeliza.

Guida Santos nu’udar negosiante restorante iha area Komoro sente triste ho situasaun eletresidade ne’ebe lakan mate, liliu iha tempu lokoraik ba kalan, tamba fo impaktu ba nia negosiu.

“Eletrisidade kuandu mate, ami tenki taka sedu, loke mos iha nakukun laran se aka atu mai, hahan no bebidas balun mos persiza eletrik, ne’ebe alende saida maka ami fan la folin, rendementu mos menus wainhira eletresidade mate,” komenta negosiate ne’e.