banner 1000x250

CNRT-FRETILIN Kestiona HNGV Sai Fatin Fashion Show

  • Share
Profesional Saude sira iha HNGV ne'ebe hatudu farda foun liu husi atividade fashion show ne'ebe realiza iha koridor HNGV. Photo: Media HNGV
banner 728x90

DILI, www.news-viptv.com – Fashion Show ne’ebe halao iha Hospital Nasional Guido Valadares (HNGV) no sai viral iha media social lori reprezentante povu Partidu CNRT no FRETILIN iha Parlamentu Nasional lamenta ba hahalok refere.

Prezidenti Komisaun F PN, Maria Gorumali Barreto. Photo: VIPhoto/Screenshoot

Deputadu Bankada CNRT, Maria Gorumali Barreto iha plenaria hateten, nu’udar Prezidenti Komisaun F ba assuntu saude, seguransa social no igualidade jeneru, ne’ebe rekomenda HNGV atu iha farda ketak-ketak hodi identifika profisaun professional saude sira iha ospital la signifika katak atu halo mos fashion show iha areadores HNGV nian.

banner 1000x250

“Hau la konkorda no kritika tebes dirijenti iha HNGV. HNGV fatin laos halo fashion show, (ospital) fatin atu konsentra moras iha ne’eba. (Fashion show) Ita hotu la konkorda, ami komisaun F la aseita situasaun ne’e, halo fashion show hau la konkorda,” kritika deputada Maria Barreto iha Plenaria Parlamentu Nasional, Segunda (13/1/2025).

Koalia situasaun balun iha HNGV, resposta ba deklarasaun politika bankada FRETILIN, deputada CNRT ne’e hateten, Komisaun F iha fulan kotu halo fiskalizasaun ba HNGV no situasaun hotu lao normal no kontroladu.

“Deklarasaun politika triste tebes. Nu’udar Komsaun F, lee deklarasaun saude, komisaun halo fiskalizasaun, deputada (lee deklarasaun politika) la ba, ami mak ba. Situasuan CT Scan kondisaun diak hela. Tempu fiskalizasaun, makina CT Scan tali coreia mak aat, maibe funsiona nafatin, 30 dezembru hadia ona, funsiona normal, lao nafatin,” dehan Deputada Maria Barreto.

Maibe, nia mos rekonese printer hoid print-out rezultadu ne’e maka aat no prosesa hola, maibe wainhira halo CT Scan dotor sira sempre lee dereta husi komputador.

“Makina la le’e, pasiente ne’e maka laiha moras, entaun dotor labele le’e,” nia dehan.

Deputadu FRETILIN, Florentino Sinarai. Photo: VIPhoto/Screenshoot

Deputadu FRETILIN, Florentino Ximenes da Costa alias Sinarai konsidera fashion show ne’ebe halo iha HNGV hatudu ministra saude nia inkapasidade no labele uza koridor ospital sai fali hanesan palku festa nian.

“Ministra saude inkapasidade orienta nia funsionariu sira iha HNGV hodi realiza eventu fashion show iha koridor hospital nian tamba fatin asesu ba ema halo movimentu sai fali hanesan palku festa nian. Ne’e tamba ministra inkapasidade lakohi rona pasiente nia halerik ba sira nia moras no tau prioridade ba suku farda nian,” dehan Deputadu Sinarai.

Nune’e mos Deputadu FRETILIN seluk, David Dias Ximenes “Mandati” husu ba governu atu tau atensaun duni ba ekipamentu saude iha HNGV, liliu CT Scan ne’ebe labele funsiona ho diak hodi rezulta nia familia vitima lakon vida ba atendementu iha HNGV.

Iha publika media HNGV esplika fashion show ne’ebe HNGV halo hodi sosializa farda foun profesionais saude liu husi kompetisaun fashion show.

Objetivo husi atividade ida ne’e atu sosializauniforme/farda foun kada diresaun ba publiku hodi bele identifika pesoal sira nia servisu entre Mediku Espesialista, Mediku Geral, Enfermeiro, Parteira, Tekniku Aliadus, Servisu Administrassaun, Seguransa no Limpeza.

Informasaun ne’e hato’o husi iha ninia Deskursu ba Atividde Kompetisaun Fashion Show Uniforme iha Areadores HNGV, Rua Bidau Toko Baru Dili, Loron Sexta Feira, 10/1/2025

“Ita hare durante ne’e HNGV difikuldade iha farda halo ita nia pesoal saúde sira hatais farda la tuir ida-ida nia profisaun, tamba ida ne’e atividade ida ohin atu hatudu uniforme foun ida publiku hodi identifika pesoal saude sira nia identidade lolos,” dehan Xefi Komisaun Organizadora, Armenia da C. Pereira.

Diretora Ezekutiva e Prezidente Konsellu Directiva HNGV, Cecilia Barros Mendonça, Lic.SP hateten atividade fashion show atu hatudu ba publiku nomos ba pesoal saude sira relasiona ho uniforme foun ne’ebe eziste iha HNGV.

Directora Ezekutiva HNGV hateten uniforme ida ne’e hanesan identidade husi pesoal servisu ida-idak nian tamba pesoal servisu HNGV hamutuk 1,000 resin ho profisaun oin-oin mak lahanesan no ho farda ne’ebe iha nia husu pesoal servisu sira atu utiliza farda tuir ida-idak nia profisaun wainhira halo atendimentu ba pasiente sira HNGV.

Writer: LEMOS, AnabelaEditor: MEILANA, Evangelisto Santos
  • Share

Leave a Reply

Your email address will not be published. Required fields are marked *

error: Content is protected !!