Bangladesh Hakarak Oferese Bolsu Estudu ba Timoroan

Dili, www.news-viptv.com – Governu Bangladesh iha nia koperasaun bilateral ho Timor-Leste hakarak oferese bolsu estudu ba Timoroan sira ne’ebe hakarak estuda iha sira nia nasaun.

Bolsu estudu ba Timoroan ne’e hateten deretamente hosi Ministru Negósius Estranjeirus Repúblika Popular Bangladesh, Dr. A.K. Abdul Momen, MP iha nia hasoru malu ho Ministru Negosiu Estranjeiru Interinu Timor-Leste, Agio Pereira, Segunda (28/8/2023), iha edifisiu MNEK, Dili.

“Sira (Bangladesh) sei oferese bolsu do estudu ba Timoroan sira ba estuda iha Bangladesh. Tamba ami mos iha universidade ho kualidade diak,” hateten Ministro Agio Pereira ba jornalista sira.

Alende ne’e, Bangladesh mos hakarak halo koperasaun oi-oin tan ho Timor-Leste, liliu iha parte mudansa klimatika nian, inklui mos setor ekonomia.

Entertantu Agio Pereira informa, Ministru Bangladesh ne’e mos admira tebes istoria luta ba libertasaun Timor Leste nian no mos orgulhu tebes ho Lider sira.

“Sira haksolok tebes vizita Timor-Leste no admira ita nia (Timor-Leste) istoria luta libertasaun no lider sira no mos sofremento nasaun nian. Sira mos sei suporta ekonomia Timor-Leste nian,” esplika Agio Pereira.

Vizita Ministru Abdul Momen iha Timor-Leste hodi diskute kona-bá asuntu bilateral no multilateral nian ho objetivu atu bele hametin liután relasaun bilateral entre Timor-Leste ho Bangladesh.

Timor-Leste ho Bangladesh estabelese relasaun diplomátika iha tinan 2003.