Australia Apoia Politika Externa Timor-Leste

PHNOM PENH, www.news-viptv.com – Australia nu´udar nasaun vizinu kontinua ni komitmentu hodi apoia Timor-Leste iha nia koperasaun bilateral, inklui politika externa Timor-Leste nian.

Politika externa Timor-Leste nian ne´e maka adezaun ba Association of South East Asian Nations (ASEAN), World Trade Organization (WTO) no Kandidatura ba Konsellu Diretus Humanus ONU nian.

Komitmentu no apoia Australia nian ne´e hato´o hosi Ministra Negosiu Estranjeiru Penny Wong iha inkontru bilaterais ho Ministra Negosiu Estranjeiru no Kooperasaun Timor-Leste, Adaljiza Magno ne´ebe halo iha Phnom Penh, Kambodia, Kinta (4/8/2022).

“Relasiona kooperasaun multilateral, Ministra Wong afirma katak Governu Australia komitmentu apoia Timor-Leste, laos det ba ASEAN, maibe mos ba WTO no candidatura Timor-Leste nian ba Konsellu Diretus Humanus ONU período 2024-2026,” hakerek komunikadu imprensa MNEK nian ne´ebe redasaun simu.

Alende ne´e, ministra rua ne´e mos koalia kona kooperasaun bilaterais neébe nasaun rua neé halo hanesan diversifikasaun ekonomia Timor-Leste, skema mobilidade traballador pasifiku no assuntu edukasaun ba bolsu estudu hodi suporta rekursu humanu Timor-Leste nian.

Kooperasaun bilateral Timor-Leste ho Australia hahu wainhira Australia lidera forsa INTERFET hafoin referêndum iha 1999 no kontinua suporta iha setor oi-oin liliu iha dezemvolvimentu no rekursu humanus.

Liu hosi portal aidtransparency.gov.tl ne´ebe publika, Australia iha numeru ida hosi nasaun 10 ba tinan ikus ne´ebe apoia fundus boót liu ho valor US$ 75,223,232.85.