Asina Akordu Izensaun Vistu ho Bangladesh, Timor-Leste sei Loke Konsuladu Honorariu iha Dhaka

DILI, www.news-viptv.com – Timor-Leste ho Bangladesh asina ona akordu konkordasaun ba izensaun vistu bá titulár passaporte diplomátiku no ofisiál no Memorandu Entendimentu sobre Mekanizmu Konsultasaun diplomátika hodi haforsa relasaun bilateral entre Timor-Leste ho Bangladesh.

Ho akordu izensaun visto ne’e, Timor-Leste mos planu ona atu loke konsuladu honorariu iha Dhaka, kapital Bangladesh.

Akordu rua ne’e asina, hafoin remata enkontru bilateral entre Prezidente Repúblika, José Ramos-Horta ho Primeiru-Ministru interinu Muhammad Yunus iha nia servisu fatin Shimul. No líder na’in rua ne’e asiste mós asinatura instrumentu kooperasaun rua refere.

Durante enkontru, Xefe Estadu, Ramos-Horta no Xefe Governu, Muhammad Yunus, halo diskusaun hosi “fuan ba fuan” no fahe hanoin ba malu hodi hametin nasaun rua ne’e nia relasaun ba futuru.

Antes ne’e, Prezidente Ramos-Horta hala’o enkontru ho Ministru Negosiu Estranjeiru Foreign Affairs of Bangladesh, Touhid Hossain, hodi diskute asuntu sira ba interese mútuo nasaun rua nian, no mós situasaun iha Rohingia.

Vizita Estadu nian, ne’ebé hala’o hosi 14 to’o 17 Dezembru 2024, reprezenta pontu signifikativu ida iha relasaun diplomátika entre nasaun rua ne’e, hodi destaka ita-nia envolvimentu internasionál ne’ebé buras daudaun.

Iha 16 Dezembru, Prezidente Ramos-Horta sei vizita Memoriál Nasionál Martir nian iha Savar hodi fó respeitu ba martir sira husi Funu Libertasaun Bangladesh nian.

Prezidente Ramos-Horta sei hala’o sorumutu ho Honorável Prezidente Bangladexe nian, Mohammed Shahabuddin, iha Bangabhaban. Líder rua ne’e sei partisipa iha serimónia resepsaun hodi selebra Loron Vitória Bangladesh nian ba dala 54. Serimónia ne’e sei inklui toka hinu nasionál nasaun rua nian, hahú ho Bangladesh nian tuir kedas ho Timor-Leste nian.

Iha 17 Dezembru, Prezidente Ramos-Horta sei hato’o palestra públika iha Institutu Estudu Internasionál no Estratéjiku Bangladesh nian (BIISS) kona-ba “Dezafiu ba Pás iha Mundu Kontemporáneu.”

Prezidente mós sei hala’o sorumutu iha salaun munisípiu ho estudante no líder juventude sira, hodi fahe ninia esperiénsia sira kona-ba Timor-Leste nia luta ba independénsia, viajen lideransa nian, no aspirasaun nasaun nian hafoin independénsia.

“Vizita istóriku ba Bangladexe reprezenta la’ós de’it de’it kompromisu diplomátiku ida – ne’e hanesan testemuña ida ba amizade ne’ebé dura entre ita nia nasaun sira no papel importante Bangladesh nian hodi apoiu viajen Timor-Leste nian ba pás no estabilidade,” hatete Prezidente Ramos-Horta iha komunikadu imprensa ne’ebe redasaun asseu. “Bainhira ita hametin ita-nia ligasaun bilaterál sira, ita hein atu esplora dalan foun ba kooperasaun ne’ebé sei fó benefísiu ba ita-nia povu sira no kontribui ba prosperidade rejionál.”

Vizita Estadu dahuluk hosi Prezidente Ramos-Horta ba Bangladesh subliña parseria ne’ebé buras daudaun entre Timor-Leste no Bangladesh, partikularmente bainhira Timor-Leste hakbesik ba adezaun tomak ba ASEAN iha tinan 2025-26, hodi loke posibilidade foun ba kooperasaun no diálogu rejionál.