ASEAN sei fo Formasaun ba Ofisial Senior Ministeriu sira

DILI, www.news-viptv.com – Atu prepara Timor-Leste sai membru full ba ASEAN, durante 2024, Sekretariadu ASEAN sei fo formasaun ba ofisial senior ministeriu sira ne’ebe inklina ba ASEAN Socio Cultural Community (ASCC).

Vise Ministra assuntu ASEAN, Milena da Costa Rangel Iha nia hasoru malu ho Ministra Edukasaun, Dulce de Jesus Soares informa katak Ministeriu Negosiu Estranjeiru no Kooperasaun (MNEK) hamutuk ho Sekretariadu ASEAN sei fo formasaun ba ofisial senior ministeriu sira kona ba ASEAN Resource Person Travelling Program (ARPTP).

”Papel edukasaun importante iha pilar sosiu kultural, enkuantu laos deit edukasaun maibe ho ministerio sira seluk ne’ebe relevante ho sosiu kultural nian. Iha oportunidade nee mak sira sei tuir formasaun ASEAN Resource Person Traveling Program ne’ebe sei lidera husi Sekretariadu ASEAN nian,” hateten Milena Rangel ba jornalista sira, Tersa (9/1/2023) iha Edifisiu Ministeriu Edukasaun, Villa Verde, Dili.

Iha fatin hanesan, Ministra Edukasaun, Dulce da Costa Soares hateten parte ME pronto atu kolabora ho Sekretariadu ASEAN no MNEK hodi partisipa ba atividade ne’ebe liga ba preparasaun ba adezasaun nian.

“Ami koalia asuntu importante ida primeiru atu hare oinsa mak Ministeriu Edukasaun prepara rekursus ruma atu nune’e waihira ASEAN hakarak ajuda parte edukasaun ita mos prontu ona atu tuir. Tamba ne’e mak iha tempu badak sei iha formasaun ida ba superior sira hodi konese alinamentu ba servisu ho nasaun sira ne’ebe hola parte ba ASEAN,” dehan Dulce de Jesus Soares.

Formasaun ba superior ministeriu nian bele garantia hadia kualidade edukasaun iha Timor Leste.

Ministeriu sira ne’ebe parte ba ASCC maka, Ministeriu Prezidensia Konsellu Ministru (MPCM), Ministeriu Solidariedade Sosial no Inklusivu (MSSI), Ministeriu Edukasaun (ME), Ministeriu Ensino Superior e Siensia (MESS), Ministeriu Interior (MI), Ministeriu Saude (MS), Ministeriu Administrasaun Estatal (MAE), Ministeriu Turizmu no Meiu Ambiente (MTMA), Ministeriu Agrikultura, Pekuaria, Peskas no Floresta (MAPPF), Ministeriu Juventude, Desportu, Arte no Kultura (MJDAK), Sekretaria Estadu Arte no Kultura (SEAK), Sekretaria Estadu Komunikasaun Sosial (SEKOMS), Sekretaria Estadu Formasaun Profesional (SEFOPE), Sekretaria Estadu ba Igualidade no Inkluzaun (SEII).