Apoia Atividade Relijioza, Governu Aloka Milaun US$ 15 ba Igreja Katolika

DILI, www.news-viptv.com – IX Governu Konstitusional liuhosi Gabinete Apoiu Servisu Sosiedade Sivil (GASS) aloka ona osan miliaun US$ 15 ba Igreja Katolika hodi hare servisu ba programa edukasaun, servisu social no Igreja.

Osan refere Governu entrega liu hosi asina tratadu subvensaun ne’ebe asina hosi Vise Primeiru Ministru no Ministru Koordenador Assuntu Sosiais, Eng. Mariano Assanami Sabino no Conferencia Episcopal Timorense (CET) ne’ebe asina hosi Arsebispu ba Arkedioseze Metropolitana Dili, Dom Virgilio Cardeal do Carmo da Silva, SDB.

“Ohin ha’u representa episkopal ho Governu ninian Vise Primeiro-Ministro mak ohin ami asina akordu, iha asina akordu ne’e ho osan millaun US$ 15 hanesan tinan uluk,” dehan Dom Virgilio Cardeal do Carmo da Silva, SDB ba Jornalista sira hafoin asina akordu, Kinta (15/02/24) iha Palácio do Governo, Dili.

Osan ne’ebe governu aloka ba Igreja Katolika ne’e hanesan subsidiu ne’ebe Governu tina-tinan fo ba iha uma kreda bazeia ba akordu internasional ida ne’ebe naran konkordata ne’e asina husi estadu Vatikanu ho estadu Timor-Leste ho nune’e atu implementa ida ne’e akordu ne’ebe mai kada tinan lima tau ninia prinsipiu gerais tinan-tinan ho Governu nune’e renova akordu ida ne’e.

“Iha espiritu konkordata ninian orsamentu ne’e aloka ba iha kategoria tolu maka hanesan edukasaun, servisu sosial no iha igreja, no osan ne’e sei fahe diosese tolu ho área tolu ne’e,” nia infroma.

Hosi osan refere, Arsebispu ne’e esplika, sei aloka osan miliaun US$ 6 hodi uza ba dezenvolvimentu ba konstrusaun fiziku hanesan harii kapela no parokia.

Iha fatin hanesan, reprezenta governu, Mariano Assanami Sabino hateten katak, governu iha nia politika kontinua nafatin hodi apoia atividade relijioza sira ne’ebe existe iha Timor laran tomak.

“Nono Governu Konstitusional nafatin fó importansia katak, edukasaun ne’e prioridade importante ba sosiedade Timor oan iha futuru, tanba ne’e ami fó apoiu total ba atividade Igreza Katolika iha Timor,” nia dehan.