APC Relata 2 Mate, 3 Kanek Grave no Uma 10 Hetan Estragus iha Semana Kotuk

DILI, www.news-viptv.com  – Ema nain 2 mate no 3 kanek grave, inklui uma 10 hetan estragus durante dezastre ne’ebe akontese iha period 19 to’o 26 Agostu 2024.

Iha konferensia imprensa, Porta-Voz Autoridade Protesaun Civil (APC), Nelson Orleans Nunes esplika, ema nain 2 mate no 3 kanek grave ne’e rejista husi asidente trafego iha Ainaro husi bus ne’ebe baku fila iha Posto Hatu-Builico, Suku Mulo, Aldeia Hautio iha 22 Agostu 2024.

“Durante Semana ida ne’e, iha rejiaun Timor-Leste normal no akontese tipu dezastre maka CNOPC-APC rejistu mak kazu tipu durante semana ida dezastre hamutuk 3 anin sobu, asidente trafego, insendiu, númeru uma estragus 10, no numeru ema afetadus 57,” informa Nelson Nunes, Segunda (26/8/2024), iha edifisiu APC, Kaikoli, Dili.

Kona ba uma ne’ebe hetan estragus, aat tamba dezastre anin bo’ot ne’ebe sobu uma 1 iha Bobonaro, uma 3 iha Ermera no 1 iha Manufahi. Entertantu, iha RAEOA, APC rejista uma 5 hetan insendiu (ahi-han).

Desde Janieiru to’o ohin loron APC rejista ona hamutuk numeru 7.000 maka iha dadus dezastre nian no APC kontinua verifika hela hodi hare kriteriu hetan apoiu husi governu nian tuir lei ne’ebe iha.

APC mos apela ba komunidade sira wainhira halo viajem ba munisipiu no fuma karik labele soe sigaru latun iha dalan ou duut maran.