Aniceto: Povu iha Maturidade iha Demokrasia

DILI, www.news-viptv.com – Prezidenti Parlamentu Nasional, Aniceto Guterres louva no kongratula povu Timor-Leste tamba iha ona maturidade iha demokrasia.

Nia hateten, kompara ho eleisaun anterior, eleisaun parlamentar foin lalais ne´e diak liu, maski partidu politiku balun iha manan no lakon.

“Orgullu ita Timor oan tomak nudar rai estadu ne´ebe foun, pais foun, ita nia demokrasia sei nurak, nivel ida nee ita nia demokrasia diak, povu maduru. Nu´udar Prezidenti Parlamentu Nasional hau hakarak felisita povu Timor tomak ne´ebe hatudu maturidade iha prosesu demokrasia iha ita nia rain, halo ita nia demokrasia sai tasak liu tan iha estadu foun,” dehan Aniceto Guterres hafoin hasoru malu xefi estadu iha Palasiu Prezidensial Dili, Sexta (26/5/2023).

Iha eleisaun parlamentar 21 Maiu 2023, Partidu Congresso Nacional da Recontrução de Timor-Leste (CNRT) lideradu hosi eis Komandante FALINTIL, Kay Rala Xanana Gusmão sai vensedor maski offisialmente Comissão Nacional da Eleiçoes (CNE) halo hela prosesu apuramentu nasional hafoin simu rezultadu provizoriu hosi Sekretariadu Teknika Administrasaun Eleitoral (STAE).

Partidu CNRT konsege hetan hikas konfiansa maioria votos hosi povu Timor-Leste hafoin iha 2018 hasoru situasaun politik ne´ebe manas ho nia koligasaun PLP-KHUNTO ho nia adversariu FRETILIN ne´e korta CNRT hodi “tebe” sai hosi governasaun ne´ebe nia deretu liu tuir konstituisaun RDTL.

Iha Eleisaun Parlmentar 2023 hamutuk iha partidu politiku 17 ne´ebe konkore. Partidu politiku sira ne´e maka;

1. Partido Desenvolvimento Nacional (PDN)
2. Partido Liberta Povu Aileba (PLPA)
3. Partido Libertação Popular (PLP)
4. Partido Democratico (PD)
5. Partido Kmanek Haburas Unidade Nacional Timor Oan (KHUNTO)
6. Partido Os verdes de Timor (PVT)
7. Partido União Democratica Timorense (UDT)
8. Partido Unidade e Desenvolvimento Democratico (PUDD)
9. Partido Republicao (PR)
10. Partido Unidade Nacional Democratica da Resistencia Timorense (UNDERTIM)
11. Partido Frente Revolucionaria Timor-Leste Independente (FRETILIN)
12. Partido Congresso Nacional da Reconstrução Timorense (CNRT)
13. Partido Centro Ação Social Democrata Timorense (CASDT)
14. Movimento Libertação do Povo Maubere (MLPM)
15. Partido Socialista Timor (PST)
16. Partido Democrata Cristão (PDC)
17. Partido Associação Popular Monarquia Timorense (APMT)