Realizasaun XII Jogos Desportivos CPLP 2025 Hetan Apresisaun Extra-ordinariu Hosi CMJD

DILI, www.news-viptv.com  – Timor-Leste iha realizasaun XII Jogos Desportivos CPLP 2025 hetan apresiasaun extra-ordinariu husi XVI Konferensia Ministru Juventude nop Desportu (CMDJ, sigla Portugues).

Durante konferensia, Koordenador Jeral eventos Jogos Desportivos CPLP 2025, atual Sekretariu Estadu Arte no Kultura (SEAK), Jorge Soares Cristovão hateten, ministru sira ne’ebe partisipa iha konferensia ne’e apresia tebes ba Timor-Leste ne’ebe susesu realiza eventos desportivos ba CPLP nian ne’e.

“Maioria ministru no delegasaun apresia tebes ho ita Timor-Leste ne’ebe susesu realiza eventos ne’e, inklui hamosu buat foun ne’ebe diferente iha jogos desportivos ne’e,” dehan Jorge Soares ba jornalista sira iha konferensia imprensa, Segunda (28/7/2025), iha Centro Convenções Dili.

Ho susesu ne’e, Komisaun Organizadora mos hato’o apresisaun ba entidade hotu ne’ebe durante ne’e apoia maxima ba realiza Jogos CPLP durante 19-26 Jullu 2025.

“Em nome komisaun interministerial hakarak hato’o agradese wain liuliu ba povo Timor laran tomak, ba joven sira hotu durante kontribui tebes ba partisipasaun ativu hodi halo Ita nia aktividade jogu ne’e bele rame no lao kapas tebes,” dehan Jorge Soares Cristovão.

Interministerial sira ne’ebe involve iha eventos jogos desportivos ne’e maka Ministeriu Juventude, Desportu, Arte no Kultura (MJDAK), Ministeriu Negosiu Estranjeiru no Koperasaun (MNEK), Ministeriu Interior (MI), Ministeriu Finansas (MF), Ministeriu Administrasaun Estatal (MAE), Ministeriu Ensino Superior, Siensia, Kultura (MESSK), Ministeriu Saude (MS), Ministeriu Turismu no Ambiente (MTA), Ministeriu Transporte no Komunikasaun (MTK), Ministeriu Komersiu no Industria (MKI), Ministeriu Edukasaun (ME), Sekretaria Estadu Komunikasaun Sosial (SEKOMS),  PNTL no F-FDTL,  ho mos grupu dancarinhas, artista no grupu isar bandeira no banda F-FDTL.

“Ba patriosinador sira ne’ebe maka ho komitmentu husi inisiu kedan atu sai nu’udar parseiru ida ba governu no estado atu apoio inisiativa ba estadu nian hanesan, TELKOMSEL, BNCTL, Be’e Leste, Timor Plaza no Timor Telecom apoio diak tebes ba aktividade desportu timor nian, Espera ke ba futuru ida ne’e Ita sei iha kontinuasaun ba Ita nia aktividade desportu nian,” dehan membru governu ne’e.

Hodi hatutan, “Hodi komisaun organizadora nia naran hato’o apresiasaun ba entidade sira hotu no instituisaun sira hotu, liuliu ba Polisia Nasional Timor-Leste (PNTL), no media sira hotu, voluntario sira hotu ne’ebe durante ne’e hatudu kapasidade no apoio. Funsionariu MJDAK, no iha SEAK, imi hotu nia apoio imi hotu nia partisipasaun no imi hotu nia kolaborasaun aktividade ida ne’e lao ho diak.”

Susesu ba eventos refere mos la ses husi kontribuisaun federasaun modalidade 8 ne’ebe kontribui ona nia atleta, treinador, arbitru, teknikuno voluntariu sira durante kompetisaun.

“Hodi Governu nia naran hato’o apresiasaun bo’ot tebes ba atleta sira imi mak nu’udar ajentis ida ba atleta sira seluk atu hatudu katak Timor tenke prepara ba futuru atu nune’e iha loron seluk Timor sai fali uma-nain partisipa iha fatin seluk Timor prontu hasoru aktividade desportu nian,” nia dehan.

Iha jogos desportivos ne’e, atleta Timor-Leste konsege hetan medalla 19 ne’ebe kolekta husi osan mean 3, osan mutin 6, no osan metan 10. Ho medalla 19 ne’e Timor-Leste okupa fatin dahat hafoin Portugal, Angola, no Cabo Verde.

Hamutuk nasaun CPLP 6 maka partisipa iha jogos desportivos ne’e maka Angola, Cabo Verde, Mozambique, Portugal, São Tome e Principe no Timor-Leste. Entertantu Brazil, Guine-Bissau no Guine Eqotorial la hola prezenza ba edisaun tinan ne’e.