Xadrezista Portugal Vensedor Klase Rapido, Timor-Leste Hetan Medalla Osan Metan

DILI, www.news-viptv.com  – Domina iha modalidade atletismu, Portugal hatudu mos nia forsa iha modalidade Xadrez liu husi nia Xadrizista ne’ebe konsege hetan medalla osan mean iha numeru rapido feto no mane nian.

Xadrezista Portugal nain rua ne’ebe hetan medalla osan mean ne’e maka Matviy Faryma iha kategoria mane no Sofia Valente iha kategoria feto.

Timor-Leste ne’ebe hatun mos nia atleta iha klase Rapido ne’e konsege hetan fatin da-toluk no hetan medalla osan metan liu husi Xadrezista Noelio Garcia Menezes.

Fatin daruak ou medalla osan mutin, hetan husi Angola liu nia Xadrezista Celio Tchilulo. Alende mane, Xadrezista feto Angola, Santana Daniela mos konsege oferese medalla osan mutin, hafoin halakon Xadrezista Cabo Verdiana, Moreno Akiane iha jogu addisional.

Hola prezensa iha atribuisaun medalla ba vensedor sira maka Ministru Justisa, Sergio Hornai, Vise Ministru assuntu ASEAN, Milena Pires, Sekretariu Estadu Arte no Kultura atual Koordenador Jeral ba eventos XII Jogos Desportivos CPLP 2025, Jorge Soares Cristovão, no Prezidenti Xadrez Timor-Leste, Zeferino Viegas Tilman.

Ba ohin loron, Xadrez sei iha tan numeru kompetisaun rua maka klase standar no mix blitz.