Komisariu Assistenti Agostinho Gomes Lidera Komando UEP

DILI, www.news-viptv.com – Komandante Jeral Polisia Nasional Timor-Leste (PNTL), Komisariu Assistenti Polisia Afonso dos Santos ho Segundu Komandante Jerál Komisaria Assistente Natersia Soares Martins fo posse Komisariu Assistenti Agostinho Gomes hodi lidera Komando Unidade Espesial Polisia (UEP).

Antes ne’e, Komando UEP lidera husi Superintendente Xefe Polísia Damião Correia ne’ebe hodi asumi fali kargu nu’udar Komandante ba Komando PNTL Munisipiu Bobonaro, ne’ebe antes ne’e asumi husi Komisariu Assistenti Agostinho Gomes desde tinan 2024.

Komisariu Assistenti Gomes iha 2009 to 2013, nu’udar Komandante Komando Unidade de Patrulhamento de Fronteira (UPF), depois nu’udar Komandante Komando PNTL Munisipiu Manufahi, Diretor Jeral Serviço de Migração de Timor-Leste (2019-2020), Komandante Komando PNTL Munisipiu Ermera (2020).

Alende superior nain rua, Superintendente Xefe Polísia Euclides Belo ne’ebe antes ne’e asumi simu kargu nu’udar Komandante Komandu Unidade Patrullamentu Fronteira (UPF), hetan mudansa hodi asumi pozisaun Komandante Komandu PNTL Munisipiu Viqueque. No Pozisaun  Komandu UPF lidera hikas husi Superintendente Xefe Polísia Calisto Gonzaga ne’ebe antes ne’e nu’udar Komandante Komando PNTL Munisipiu Covalima.

Entretantu, Komandu PNTL Munisipiu Baucau assume husi Superintendente Xefe Polísia João Sancho Pires no

Superintendente Xefe Polísia Joni Viana das Regras hodi assume kargu nu’udar Komandante Komandu PNTL Munisipiu Manatuto.

Ba Komandu PNTL Munisipiu Lautem, asumi husi Superintendente Xefe Polísia António Regu Fernandes no Komandu PNTL Munisipiu Ainaro assume husi Superintendente Xefe Polísia Emilio dos Santos.

Ba Regiaun Administrativa Espesial Oe-cusse Ambeno (RAEOA), komandante jeral PNTL fo konfiansa ba Superintendente Xefe Polísia Nicolao F. da Costa.

Superintendente Polísia Luis da Silva, ne’ebe antes ne’e kaer Komando PNTL Munisipiu Ainaro, hetan konfiansa foun hodi asumi Segundu Komandante PNTL Munisipiu Dili.

Dirijenti Superior PNTL seluk ne’ebe simu mos posse iha Segunda (20/4/2026) maka Superintendente Polísia Basilio de Jesus assume kna’ar hanesan Komandante Centro Formação Polícia (CFP), Diresaun Justisa no Disiplina PNTL lidera husi Superintendente Xefe Polísia Moises Amaral no Superintendente Xefe Polisia Inacio Saldanha assume kargu nu’udar Xefe Departamentu Seguransa Komandu Jerál nian.

Iha ninia diskursu ba serimonia ne’ebe hala’o iha Kaurtél Jerál, Komandante Jerál PNTL Komisariu Assistente Polísia Afonso dos Santos perante emposadu sira hateten importante tebes ba kada Komandante Komandu Munisipiu sira atu iha ligasaun ne’ebe diak ho parte hotu hanesan Autoridade Munisipiu, Igreja inklui Veternu sira atu nune’e bele apoiu servisu Polísia nian hodi asegura Seguransa iha idak-idak ninia munisipiu.

“Iha hau nia vizita servisu hamutuk ho Segundu Komandante Jerál foin lalais ne’e iha munisipiu Baucau, ami hasoru malu ho Prezidente Autoridade Munisipiu inklui Bispu Diocese Baucau nian, simu ami diak tebes no sira apresia no louva tebes servisu membru PNTL sira iha munisipiu Baucau hodi asegura diak seguransa durante ne’e iha munisipiu Baucau,” dehan Komandante Jerál PNTL ne’e.

Komisariu Assistente Polísia ne’e afirma liu tan katak importante maka sai Komandante ne’ebe maka iha ligasaun diak ho povu, husi autoridade lokal no aldeia sira inklui kontrola efetivu membru sira ne’ebe iha kada Komandu Munisipiu.