PR Ramos-Horta fo Posse ba Jesuina Gomes Nu’udar Vise Ministra MNEK

DILI, www.news-viptv.com – Prezidente no Laureadu Nobel ba Pás, J. Ramos-Horta, fo tomada de posse ba Vise-Ministra Negósiu Estranjeiru no Kooperasaun IX Governu Konstitusionál, Jesuína Maria Ferreira Gomes, MPA, Kinta (5/3/2026), iha Palásiu Prezidensiál Nicolau Lobato.

Nomeasaun ba Jesuína Gomes formaliza tuir Dekretu Prezidente Repúblika No.20/2026.

Jesuína Maria Ferreira Gomes, MPA, lori esperiénsia barak ba knaar ida-ne’e, foin lalais ne’e nia serbisu nu’udar Xefe Casa Civil Prezidénsia Repúblika nian, pozisaun ida ne’ebé nia hetan nomeasaun hosi Prezidente J. Ramos-Horta iha loron 11 fulan-Jullu tinan 2023. Nia iha Mestradu iha Administrasaun Públika husi Universidade Hawai’i at Manoa Estadus Unidus Amérika.

Ninia kareira distintu iha funsaun públika inklui serbisu nu’udar Provedoria ba Direitus Umanus no Justisa – PDHJ hahú hosi loron 7 fulan-novembru tinan 2018, to’o loron 5 fulan-janeiru tinan 2023. Antes ne’e, nia sai nu’udar Adjunta Provedoria ba Boa-Governasaun iha PDHJ hosi fulan-Janeiru 2014, to’o loron 15 fulan-Novembru 6, 2018. Husi tinan 2009 to’o 2014, nia hala’o kna’ar nu’udar Komisária ba Komisaun Funsaun Públika, ne’ebé foka liu ba formasaun no dezenvolvimentu, no mós serbisu nu’udar formadora iha Institutu Nasionál Administrasaun Públika (INAP).

Ninia esperiénsia extensivu  iha setór públiku inklui mós mandatu badak ida nu’udar Inspetora Jerál Ministériu Administrasaun Estatál no Ordenamentu Territoriál (Jullu-Setembru 2009). Uluk iha ninia kareira, nia servisu hamutuk ho organizasaun internasionál oioin hanesan Peace Corps, USAID, no AUSAID, no nu’udar dosente iha Fakuldade Siénsia Sosiál Universidade Nasionál Timor-Leste (UNTL).

Nia hahú nia perkursu profisionál iha administrasaun públika iha tinan 1994, servisu iha kapasidade oioin inklui Sekretária Xefe iha Administrasaun Suku Atabae, Munisípiu Bobonaro (1995-1997). Nu’udar rekoñesimentu ba nia kontribuisaun signifikativu sira ba administrasaun públika, governasaun di’ak, direitus umanus, no dezenvolvimentu institusionál, Jesuína Gomes simu  kondekorasaun Kolár Orden Timor-Leste nian iha loron 28 fulan-novembru tinan 2023.

Prezidente Ramos-Horta afirma, “Sra. Jesuína Maria Ferreira Gomes nu’udar servidór públiku ho integridade boot no kompeténsia komprovadu. Ninia esperiénsia kle’an iha governasaun, direitus umanus, no kooperasaun internasionál sei sai importante tebes bainhira ita kontinua hametin Timor-Leste nia parseria sira iha rai-li’ur no avansa ita-nia interese nasionál sira iha palku globál ha’u fiar katak nia sei serbí nasaun ho distinsaun iha ninia papél foun.” Prezidente hatutan tan: “Serbisu besik nu’udar ha’u nia Xefe Gabinete, ha’u asiste rasik ninia dedikasaun no étika serbisu. Nia iha kapasidade kombinasaun perfeita husi perísia téknika no kompromisu kle’an ba ita-nia povu, ne’ebé halo nia sai kualifikadu tebes ba karteira importante ida-ne’e.”

Prezidente dezeja ba Jesuína Maria Ferreira Gomes, susesu boot iha ninia funsaun foun sira, serbí povu no interese Repúblika Demokrátika Timor-Leste nian.