2019-2022, FFTL Simu Miliaun 7 USD hosi FIFA 

DILI, www.news-viptv.com – Federasaun Internationale Football Association (FIFA) desde tinan 2019 to´o 2022 aloka ona osan miliaun 7 dolares amerika ba Federasaun Football de Timor-Leste (FFTL) ba dezenvolvimentu futebol iha nasaun ne´e.

Orsamentu ne´ebe FIFA fo ba FTTL ne´e relata liu hosi relatoriu annual FIFA ba programa FIFA Forward Program.

“Hosi 2019-2022, total miliaun hitu (7) USD aloka ona hodi supporta futebol Timor-Leste liu hosi FIFA Forward 2.0,” hakerek relatoriu FIFA ne´ebe redasaun simu hosi Divisaun Komunikasaun FIFA, Kinta (24/2/2023).

Ba tinan hat tuir mai, iha relatoriu annual FIFA nian ne´e mos afirma katak Timor-Leste priense ona kriteriu hodi simu tan fundus 29 % hosi total orsamentu FIFA nian hodi dezenvolve futebol iha Timor-Leste liu hosi programa FIFA Forward 3.0.

Iha planu 2023-2026, total investimentu FIFA Forward tau ona fundus miliaun 2.250 USD  ne´ebe konsidera sa´e dala 7 iha dezenvlvimentu futebol nian kompara programa dezenvolvimentu nian iha 2016.

Hosi porsentazem (29%) ne´ebe iha, kada membru nasaun iha FIFA Forward 3.0, inklui Timor-Leste (FFTL) sei simu miliaun 8 USD ba projetu dezenvolve no operasional futebol nian.

“Dever FIFA hodi oinsa garante laos deit torneiu global ho involvimentu labarik feto no mane, mane ho feto hosi mundu tomak, maibe futebol kontinua fo oportunidade ba ema hotu, iha ne´ebe deit sira moris,” dehan Prezidenti FIFA, Gianni Infantino.

Laos deit ba Timor-Leste relatoriu annual FIFA nian ne´e mos mensiona fundus ne´ebe FIFA fo ba nasaun membru sira, inklui Indonesia no Australia, maski nasaun vizinu ruane´e nia dezenvolvimentu futebol diak lu kompara ho Timor-Leste, iha tinan 2019-2022 simu deit miliaun 6 USD.

FIFA iha presidensia Gianni Infantino lori ona FIFA ba reformasaun ne´ebe luan, haluan partisipasaun global iha kompetisaun prinsipais sira no hasa´e investimentu FIFA nian iha dezenvolve futebol liu hosi Forward Programme.

Saida maka Programa FIFA Forward, programa ne´e desempeña papel fundamental ida ba promosaun iha desenvolvimento futebol globalmente. Nu´udar pilar sentrais ba vizaun 2020-2023, ne´ebe defini ona hosi Prezidente FIFA, Gianni Infantino.

Programa desenvolvimento prinsipal FIFA ajuda aumenta kompetitividade global, nomos prinisipiu seluk hosi planu asaun refere.

Durante siklu 2019-2022, FIFA Forward fornese investimentu kada nasaun membru ho osan miliaun 6 USD hodi finansia nesesidades operasionais no projetu desenvolvimento.

“Liu miliaun 1 USD alokadu ba membru nasaun sira ne´ebe iha rendementu annual miliaun 4 USD ou menus hodi ajuda nesesidade viagem no ekipamentu,” hakerek relatoriu FIFA ne´e.

Maski durante siklus 2019-2022 simu apoiu fundus hosi FIFA, FFTL sedauk bele realiza liga futebol rasik no sei depende ba orsamentu jeral estadu liu hosi Sekretaria Estadu Joventude no Desportu. No Liga Timorense iha tinan 2022 labele realiza hodi halo fali iha semana hirak liu ba mos sei kontinua depende ba orsamentu SEJD nian.