15-19 Outubru Festival Rabilau Hahu

DILI, www.news-viptv.com – Hodi realiza programa Prezidenti Republika nian atu promove kultura dan turismo Timor-Leste nian, governu sei realiza Festival Rabilau iha 15-19 Outubru 2024.

Iha inkontru preparasaun ne’ebe governu halo ho Prezidenti Republika, Jose Ramos-Horta, festival ne’ebe sei realiza iha Postu Administrativu Maubise, Munisipiu Ainaro ne’e, governu espera sei hetan partisipasaun barak husi sidadaun sira tantu nasional no internasional.

“Nu’udar Vise Primeiru Ministru maka hanesan prezidensia ba komisaun organizadora iha Festival Rabilau hakarak promove ita nia kultura, promove mos turismu, tanba iha aktividade lubuk ida ne’ebe mak ita sei halo iha ne’eba, ita hein katak ema internasional, ema nasional no ema hotu-hotu bele hola parte iha festival ida ne’e,” dehan Vise-Primeiru Ministru, Ministru Koordenador  Asuntus Sosiais no Ministru Dezemvolvimentu Rural no Habitasaun Komunitaria, (VPM-MCAS-MDRHC), Eng. Mariano Assanami Sabino ba jornalista sira hafoin inkontru ho xefi estadu, Segunda (23/9/2024), iha Palasiu Presidensial.

Membru governu ne’e esklarese, festival ne’e importante tebes para atu promove Timor-Leste nia kultura, no kultura husi kedas, barlaku, kultura festa, kultura hahan, oinsa kulinariu ba tein oin-oin ne’ebe mak iha.

“Ita nia hahan nultirtivu oin-oin ne’ebe maka ita iha, nune’e mos ba lia moris no lia mate nian, ne’ebe mak ita nia beala sira halo, ita hakarak promove fila-fila ida ne’e,” hateten vise primeiru-ministru Assanami.

Iha nia implementasaun, Festival Rabilau sei iha atividade oioin ne’ebe fahe ba Seminariu ho mos halo promosaun ba Siensia Teknologia ne’ebe mak lidera husi Ensinu Superior, aktividade desportu Dili Maratona ne’ebe lidera husi Ministru Juventude Desportu Arte no Kultura (MJDAK).

Xefi Estadu, esplika Assanami, hakarak mos kulinariu tradisional iha atividade ne’e, maibe tenki ho nutritive ho folin baratu.

“Prezidente Republika mos fo hanoin liu-liu ba hahan sira ne’e tenke nutritivu, kualidade maibe nia folin tenke tun, entaun ita nia ezensia ida maka tenke hasae nia produsaun , no ita mos tenke prove nafatin ita nia modelo kolinariu sira ne’ebe maka labele halakon nia nutrisaun, ne’e hotu importante,” dehan Assanami.