Timor-Leste Selebra Tinan Ida Vizita Papa Francisco

DILI, www.news-viptv.com  –  Missa Primeiru Anniversario Vizita Papa Fransisco nian Mai Timor-Leste Kuarta (10/09/2025) iha Tasi-tolu Dili.

Iha homilia Arsebispu Metropolintana Dili, Dom Virgilio Kardeal do Carmo da Silva SDB hatete, ho misa agredesementu tinan ida vizita Papa Francisco ho prezensa iha Timor-Leste hatudu ba sarani sira hodi hametin fiar ba Maromak, habo’ot esperansa no haburas karidade ba malu.

“Iha liafuan murak ne’ebe Santu Padre hameno hela iha diskursu sira ne’ebe nia hato’o, iha Nia homilia no justru sira ne’ebe hatudu ona halo Ita sente duni katak Papa Fransisco nia domin no nia avensaun ba povo Timor fiar nain no hatene haksolok, haksolok Ida ne’ebe mai husi fuan Timor-oan maka Papa nia fuan monu ba Timor hodi nia hato’o nia deklarasaun domin ida ne’ebe sinseiru kona-ba Timor katak, Papa Fransisco nia laran monu ba Timor-Leste, tan ne’e Nia hare’e rasik ho matan ho ida ne’ebe orijinal ksolok ida ne’ebe autentika akualimentu ne’ebe extraordinaria no domin ne’ebe puro Timor-oan sira fo ba Santu Padre,” dehan Kardeal do Carmo.

Prezensa Papal (João Paulo II no Francisco) sira iha Timor-Leste hatudu katak Timor-Leste independensia la ses husi Maromak nia domin ne’ebe haruka papal sira mai.

“Ho nune’e nudar fiar nain Ita agradese ba Aman Maromak halo ona buat diak oioin mai Ita, ohin Ita Mai halibur iha Tasi-Tolu, ho Ita rekohnese katak iha fatin ida ne’e eventu historiku bo’ot rua ne’ebe laos deit hatudu Ema Timor Nia fiar, maibe mos koloka rai krus iha mapa mundo nian,” dehan uniku Kardeal iha Timor-Leste ne’e.

Ho prezensa papal rua ne’e, Timor hatudu ba mundo katak iha rai kiik Ida ne’e iha Roma fiar Katolika nian ne’ebe nabilan daudaun iha kontinente aziatika nia laran.

“Papa Francisco hare’e hetan reinu ida ne’e, iha Timor Oan sira nia fuan, iha labarik sira nia fuan foin Sa’e sira, katuas no ferik sira rona evanjellu nian mak sai sei roman ba Ita Nia kultura, hodi nune’e valor evanjellu nian bele moris ho hola isin iha Ita Timor Oan nia fuan, hodi transforma Ita husi laran atu ita bele moris iha lian ida deit ne’ebe ho ilas Timor-oan nian,” nia dehan.

Kardeal do Carmo mos repete hikas Papa Francisco nia mensajem ba ukun nain sira atu kuidadu no tau matan nia povu tamba rai ida ne’e nia kmanek mak nia povu.

“Tau matan ho didiak no hadomi imi nia povu, halo povu ida ne’e sai buras, povu ida ho diak tebes,” dehan Papa Francisco ne’ebe repete hikas husi Kardeal do Carmo.

Carlos Cowboy nu’udar sarani senti kontenti bele partisipa iha misa agradesementu ne’e hodi hatudu ba mundu katak Timor maioria Katolika.

“Ita bele hateten ohin laos amu papa nia prezensa, maibé  aniversairu ba amu papa nia prezensa, se selu kazu, karik amu papa maka Maromak la bolu, ha’u  fiar katak ohin nia mensajem iha kedas vatikanu. Timor hakerek  istoria, laiha nasaun hotu-hotu hakilar hanesan ita, hatudu katak sarani timor-oan labele lakon fé no esperansa,” dehan Carlos.

Nune’e mos Angelina da Costa hateten,”Ha’u nu’udar sarani ida ha’u agradese tamba durante ninia lia menon ne’ebe  nia rai hela ba timor oan sira katak, ita nu’udar ema sarani, hakbesik an ba Maromak,  labele ses husi Maromak,  maske difikuldade  no problema, maibé  fiar nafatin ba Maromak”.