Simu Posse, Xefi Estadu husu MJ tau atensaun ba Defensoria Públika

DILI, www.news-viptv.com –  Prezidente Repúblika, Jose Ramos-Horta, husu ba Ministru Justisa (MJ), Sergio de Jesus Fernandes da Costa Hornai tau atensaun makas ba defensoria públika ne’ebé sai abut ba setór justisa.

Xefi estadu apela ne’e ba Sergio Hornai hafoin fo posse ba MJ foun ne’e hodi troka saudozu Amandio de Sa Benevides ne’ebe fila ona ba ba kadunan santu hafoin hetan atakasaun fuan fulan kotuk liu ba.

Timor Leste, esplika PR Ramos-Horta, ho kondisaun sosiál, ekonómiku país ninian, defensoria públika hola pozisaun ida importante, iha kazu barak ne’ebé julga no provavelmente ho rezultadu la justu, presiza tebes defensoria públika atu tau matan ho atensaun.

“Tanba ne’e ha’u apelu ba Ministru Justisa atu tau atensaun bo’ot ba reforsa, apoiu, no dignifika defensoria públika,” hateten PR Ramos-Horta, Kinta (15/2/2024), iha Palasiu Prezidensial, Dili.

PR Ramos-Horta hateten, setór justisa hanesan pillár ida importante iha estadu direitu demokrátiku, justisa ida kompetente, idonia, indepedente, imparsiál no ida ne’e sei halo balansu no ekilibriu ba faktus, sirkuntansia no ida ne’e sei sai justisa ida verdadeiru ba sidadaun sira.

“Senti ksolok fó posse ba Ministru Justisa foun ne’ebé iha kareira brillante iha setór justisa. Dezempeñu no revela funsaun no antes ne’e hanesan defensór públiku no Komisáriu KAK,” dehan Xefi Estadu.

Iha nia deskursu, Xefi Estadu mos dezeju susesu iha servisu no funsaun foun Sergio Hornai nu’udar Ministru Justisa.

”Ba ministru sesante sira ne’ebé antes ne’e fó mós dedikasaun iha Ministériu Justisa hodi serbí estadu direitu demokrátiku obrigadu no maiór felesitasaun ba ita bo’ot nia kareira,” nia hateten.

Iha Fatin hanesan, Ministru Justisa, Sergio Hornai, hato’o nia agradese ba konfiansa tomak husi povu no Governu ne’ebe fo ona konfiansa hodi indijita nia sai hanesan Ministru Justisa hodi substitutu ba nia kolega sadozu matebian Amandio Benevides ne’ebe nia mos servisu kleur ho matebian.

“Ohin ha’u simu responsabilidade ida, la’os oportunidade difisil mais ha’u iha dezafiu lubuk ida ne’ebé ha’u tenke infrenta para atu hare konaba konsolidasaun estadu direitu demokratiku nian iha dezena politika setor Justisa nia,” dehan Sergio Hornai.

Nu’udar ministru, nia hateten, sei integras ba iha prioridade ne’ebé programa sira halo ona tuir Orsamentu Jeral Estadu 2024.

“Orsamentu sira halo tiha ona i ha’u sei haree ida-ida diresaun, ida-idak kooperasaun, ida-ida stake holder ne’ebé ita halo servisu hamutuk para bele atu konsolida hamutuk ho hau nia Vise Ministru, Sekretariu Estadu, diretor jerais sira no agentes funsionarius sira iha ministeriu para atu hare saltada ida ba oin,” dehan membru governu foun ne’e.