SECOMS La Konkorda Timor-Leste Konvida Jornalista Indonesia ba Kobertura Jogos CPLP

Dili, www.news-viptv.com – Relasiona ho Jogos Desportivas CPLP tinan rihun rua rua nolu resin lima ne’ebe sei realiza iha Timor-Leste, Sekretariu Estadu Komunikasaun Sosial (SEKOMS), Expedito Dias Ximens la konkorda atu komisaun organizadora konvida jornalista Indonesia hodi halo kobertura iha jogos refere.

Tuir Expedito, ba kobertura jogos CPLP, media Timor-Leste mos bele halo kobertura hodi bele espailla mos ba mundu.

Hatan ba preokupsaun SEKOMS, Ministru Juventude, Desportu, Arte no Kultura, Nelyo Isaac Sarmento esplika, objetivu Komisaun Organizadora konvida jornalista husi media balun Indonesia nian hodi halo promosaun, alende promosaun iha rai laran no mos hodi hatudu ba estadu membru ASEAN, katak Timor-Leste mos bele ona realiza eventu desportu internasional ho involvementu estadu membru CPLP sira.

Media, Marketing no publikasaun no nu’udar seksaun ida ne’ebe estabelese iha komisaun organizadora ho nia misaun oinsa halo promosaun no divulga informasaun antes no iha tempu realizasaun jogos nian.

Iha Sexta loron sanulu resin hat fulan Marsu, Ministeriu Juventude, Desportu, Arte no Kultura realiza inkontru interministerial ho membru governu hirak ne’ebe tama ba komisaun interministerial. Enkontru ne’e foka ba revizaun progresu preparasaun ba Jogu CPLP nian ba dala sanulu resin rua, ne’ebé tuir planu sei hala’o iha Timor-Leste iha fulan Jullu tinan ida ne’e. Diskusaun ne’e subliña atividade xave sira ne’ebé sei hala’o molok, durante, no hafoin jogu sira, ho kontribuisaun sira husi komisaun interministeriál ne’ebé tau matan ba eventu ne’e.

Alende Jogos Desportiva CPLP, iha mos konferensia ministru juventude no desportu CPLP nian, inklui Forum Juventude CPLP.