PR Ramos Horta: Musulmanu Timor-Leste Parte Identidade Nasaun

DILI, www.news-viptv.com –  Presidente Republika (PR), Jose Ramos-Horta, iha nia mensajen selebrasaun loron Idul Adha ba Musulmanu sira iha Timor-Leste, rekonese musulmanu iha Timor-Leste mos hola parte mos iha identidade nasaun.

Xefi estadu hateten, Idul Adha fó-hanoin kona-ba lisaun kle’an sira ne’ebé aprende husi istória dispozisaun profeta Ibrahim hodi sakrifika nia oan-mane obediénsia ba ordem Maromak nian. Tempu atu refleta kona-ba valór sira husi ema idak nia an rasik, devosaun, no Forsa husi ema nia konviksaun.

“Hodi povu Timor-Leste nia naran, ha’u hato’o ha’u-nia votus kmanek liu ba imi hotu iha okaziaun Ksolok Idul Adha,” hateten Xefi Estadu iha komunikadu imprensa ne’ebe redasaun simu husi Palasiu Prezidensial, Segunda (17/6/2024).

Iha loron ne’e, esplika PR Ramos-Horta, nia hakarak rekoñese kontribuisaun ne’ebé boot husi Maun-alin no Inan-Feton Musulmanu sira-nian ba sosiedade Timor-Leste.

“Imi-nia komitmentu ba fiar, família, no komunidade sira-ne’e hala’o ona papél importante ida hodi forma ita-nia nasaun nia identidade no haburas espíritu unidade no komprensaun,” dehan xefi estadu.

Liu husi selebrasaun Idul Adha, xefi estadu bolu ba ema hotu atu kontinua iha komitmentu ba relijiaun nia armonia no respeitu malu.

“Iha Timor-Leste, ita orgullu tebes ho ita-nia diversidade no ko-ezisténsia pasifika husi fiar oioin. Ha’u hein katak Idul Adha ida-ne’e bele hametin liután relasaun irmaun-irman sira-nian iha sidadaun hotu-hotu nia leet, la haree ba sira-nia fiar relijioza,” dehan PR Ramos-Horta.

Durante selebrasaun ida-ne’e, ema numeru ida iha Timor-Leste ne’e fo hanoin-hetan mós maluk sira ne’ebé iha susar nia laran no fó apoiu no laran-sadi’a ba sira.

“Idul Adha nia esensiál loos mak fahe ita-nia bénsaun no lori ksolok ba ema seluk nia moris. Dala ida tan, ha’u hato’o ha’u-nia votus Kmanek ba imi hotu ne’ebé selebra Idul Adha ho haksolok, dame, no prosperidade. Hein katak Idul Adha nia espíritu sei lori ksolok, unidade no kumprimentu espirituál ba Musulmanu sira iha Timor-Leste no mundu tomak,” hateten PR Ramos-Horta.