PR Ramos-Horta Husu Governu Tau Matan ba Vitima no Sobrevivente 1999

Liquica, www.news-viptv.com – Prezidente Republika (PR), Jose Ramos-Horta husu ba governu atu tau matan mos ba vitima no sobrevivente sira ne’ebe sofre no terus durante violensia ne’ebe sira hetan durante tempu luta ba ukun rasik an.

Xefi estadu informa kestaun ne’e wainhira partisipa komemorasaun masakre Liquisa ba tinan 26 ho tema Memorializasaun  Nu’udar Dalan Ba Dame Hodi Valoriza No Dignifika Herois Da Patria, Sexta (4/4/2025), iha Liquisa.

Iha komemorasaun ne’e, xefi estadu hato’o nia onra ba vitima sira hodi buka tulun vitima sira ne’ebe sei moris hodi dezemvolve rai ne’e ho diak para hamate kiak iha rai ne’e.

Hola prezensa mos ba komemorasaun refere Vise Primeiru Ministru no Ministru Koordenador assuntu social no mos Ministru Desemvolvimentu Rural no Habitasaun Komunitaria, Mariano Assanami Sabino.

Komemorasaun ba loron refere halo ho modelu seminariu no dialogu ho objetivu principal mak, atu lori parte hotu-hotu hodi hatudu komprimisiu ida, ba hakotu korente odiu-vigansa ne’ebe hatutan ba jerasaun sira mak sei mai, no mos fo importância, hodi aprende no espresa valor direitos umanus, istoria no mekanismu sira justisa tranzisional.

Iha 5 no 6 de Abril 1999 acontece Massacre Bot ida iha Residência Igreja São de Brito Liquiça nebé hakanek vítima civil barak no hamate ema força laek kuaze atus rua tamba deit luta ba princípio ukun rasik’an iha tempo ne’eba.