PR Ramos-Horta ho PM Xanana Partisipa Resepsaun Diplomatik KBRI Dili

DILI, www.news.viptv.com – Prezidente Repúblika, (PR) Jose Ramos-Horta ho Primeiru Ministru Kay Rala Xanana Gusmao partisipa iha reseipsaun diplomátiku ba komemorasaun loron independensia Republika Indonesia ba tinan 79 ne’ebé organiza husi Emabixada Indonézia iha Timor-Leste, Kinta (21/11/2024), iha Salaun Multiusos Dili.

Xefi estadu hateten, alende Indonesia ne’ebe selebra nia loron independensia, Timor-Leste ba tinan ne’e mos selebra nia aniversáriu ba dala 25 hosi Akordu Nova Iorke no Konsulta Populár hosi loron 30 fulan-agostu tinan 1999.

Prezidenti Republika mos kongratula Prabowo Subianto nu’udar prezidenti foun ba Republika Indonesia no konfia katak Prezidenti Prabowo  sei lori progresu foun ba Indonesia, no sei kontinua atu hametin multilateralizmu, Direitu internasionál, parseria rejionál no globál, inklui nia ligasaun espesiál ho Timor-Leate.

Prezidente Ramos-Horta destaka kolaborasaun ne’ebé la’o daudaun entre nasaun rua ne’e iha fórum multilaterál oioin, inklui ASEAN no Nasoins Unidas, enkuantu elojia projetu konjuntu sira iha edukasaun, saúde, komérsiu, seguransa, no kultura nu’udar ezemplu konkretu sira-nia kompromisu hamutuk ba dezenvolvimentu no kooperasaun rejionál.

Embaixador Okto Durinus Manik hateten ho selebrasaun loron independensia Indonesia, husu ba nasaun vizinu sira, inklui Timor-Leste atu iha unidade no kolabora hamutuk, hodi lori mundu ida-ne’ebé di’ak liu no inkluzivu ba ema hotu.

Indonesia liu husi nia Embaixada iha Timor-Leste iha komitmentu nafatin hodi hametin liu tan kooperasaun bilateral entre Indonesia ho Timor-Leste iha setor hot-hotu.