Portugal Komitmentu Apoia Timor-Leste iha Setor Justisa no Edukasaun

DILI, www.news-viptv.com – Rekonese Timor-Leste iha valor demokratiku no importante iha rejiaun Sudeste Aziatiku, Governu Portugal kontinua nia komitmentu hodi apoia no reforsa setor Justisa no Edukasaun liu husi formasaun ba rekursu umanu Timor-Leste.

Komitmentu Governu Portugal ne’e hato’o dereta husi Ministru Negósiu Estranjeiru Portugal, Paulo Rangel wainhira hasoru malu ho Primeiru-Ministru, Kay Rala Xanana Gusmão, iha Gabinete Fronteira Terrestre no Marrítima, Palacio do Governo, Kinta (12/9/2024).

“Portugal hakarak atu kontinua fo apoiu formasaun ba Timoroan sira iha area rua ne’e (justisa no edukasaun, red) tanba Timor-Leste iha ninia valor demokratiku iha rejiaun ne’e,” dehan Paulo Rangel.

Iha nia inkontru ho PM Xanana, Paulo Rangel ko’alia kona-bá estabelesimentu no reforsa kooperasaun bá tinan 2024 to’o 2028 iha setor rua refere.

Ministru Negosiu Estranjeiru Portugal ne’e kongratula mos Timor-Leste ne’ebe foin selebra loron aniversariu tinan 25 Konsulta Popular ne’ebe hetan partisipasaun husi Sekretraiu Jeral ONU, Antonio Guterres no vizita espesial husi Papa Francisco durante loron tolu iha 9-11 Setembru 2024.

Vizita Paulo Rangel, esplika PM Xanana, hanesan onra ba Timor-Leste hodi hametin liu tan koperasaun bilateral entre nasaun rua, ne’ebe husi nia vizita mos promote sei haruka Ministru Edukasaun mai vizita Timor-Leste.

“Ohin nia promete atu haruka tan mai ministro da edukasaun, ohin koalia kona ba koperasaun entre Portugal ho Timor iha áreas barak mas ami konkorda malu iha areas rua ne’ebe importante tebtebes maka setor justisa no setor edukasaun. Setor edukasaun formasaun ba professores ho esplorasaun eskola CAFÉ, ho tan imi hotu hatene iha kraik ne’eba ne’e fatin ba eskola Português tan tanba ita CPLP,” hateten PM Xanana.