PM Xanana: La Rezolve Junta Militar Myanmar, TL Sei La Tama ASEAN

DILI, www.news-viptv.com – Timor-Leste hasai nia pozisaun ba Association South East Asian Nations (ASEAN) sei la fiar ba assosiasaun ne’e no la tama ASEAN, wainhira labele rezolve problema Myanmar ne’ebe la respeita ona valor demokrasia iha sira nia nasaun. 

Statementu Timor-Leste nain ne’e deklara hosi Primeiru-Ministru Timor-Leste, Xanana Gusmão ne’ebe husu nafatin ba lideransa ASEAN hodi hamutuk buka solusaun ba problema Myanmar.

“Se ASEAN laiha kbi’it atu konvense Junta Militar iha Myanmar, entaun hau bele dehan Timor-Leste sei la fiar assosiasaun ne’e, ida ne’e pozisaun Governu nian,” deklara PM Xanana ba jornalista sira hafoin hasoru Prezidenti Republika, Jose Ramos-Horta, Kinta (3/8/2023), iha Palasiu Prezidensial, Dili.

PM Xanana mos esklarese, antes ne’e nia hato’o ona ba Sekretariu Jeral ONU, Antonio Guterres katak Timor-Leste nia pozisaun sei la tama ASEAN, bainhira assosiasaun laiha kbi’it konvense Junta Militar Myanmar.

“Timor-Leste nia pozisaun ba ASEAN maka ne’e, hau nu’udar Primeiru Ministru, Timor-Leste sei la tama ASEAN, bainhira assosiasaun laiha kbi’it atu konvense junta militar, ida ne’e pozisaun Timor-Leste nian, hanesan mos pozisaun sekretariu jeral ONU, Antonio Guterres nian,” dehan PM Xanana.

Promesa Junta Militar Myanmar ba realizasaun eleisoens iha Agostu 2023 hafoin golpe iha 2021 sei la realiza no offisialmente adia fali tan.

Dezisaun ne’e foti hafoin lider Junta Militar, Min Aung Hlaing iha Segunda (31/7/2023) anunsia ona atu prolongga estadu emerjensia ba fulan nen tan, sita Reuters.

Violasaun ne’ebe sei akontese iha Myanmar sai razaun junta militar adia eleisoens.

“Iha realizasaun eleisoens, atu eleisoens lao livre no justu,no bele fo votu ho laiha tauk, nesesita atu aranja seguransa nune’e estadu emerjensia persiza extende,” deklarasaun hosi junta militar iha TV Governu, tuir publikasaun CNNIndonesia.

“Brutalidade rezim ne’ebe luan no desrespeita aspirasaun demokrasia povu Myanmar sei kontinua krizi,” dehan Porta Voz Ministeriu Negosiu Estranjeiru EUA, Matthew Miller.

Myanmar iha krizi politika no humanidade hafoin militar halo golpe iha Fevereiru 2021. Junta akuza partidu vensedor, Liga Demokrasia Nasional (NLD) halo frauda durante votasaun iha Novembru 2020.

Iha nia asaun, military kaptura Prezidente Partidu NLD, Aung San Suu Kyi, no mos Prezidenti no Vise Prezidenti Myanmar.

La simu ho golpe refere, povu tun iha dalan hodi protesta militar nia asaun, maibe Junta responde ho violensia.

Milisia balun iha Myanmar foti asaun kontra no hasoru. Sivil barak maka hit kilat hafoin treina sekreta iha ailaran. Rezime Aung Hlaing mos kaptura no oho se-se det maka kontra governasaun Junta Militar nian.

Observasaun hosi ajensia direitu humanu sira, Associação de Assistência aos Presos Políticos (AAPP) relata vitima mate desde golpe hamutuk 3.875 orang, nain 24.100 maka hetan kapturasaun no nain 19.733 maka detidu.